Mizoram khawthlang lam fang tura nimina zin chhuak Chief Minister Pu Lal Thanhawla chuan nimin khan Zawlnuam a thleng a. Zawlnuama sorkar hnathawk awmte chu nimin tlai vek khan BDO quarter-ah kawmin Democracy ah chuan sorkar siamtu an in thlak thin a, sorkar hnathawkte erawh chu an in thlak ngai lo a ni, a ti a. Chuvangin sorkar hnathawkte chu sorkar neitu dik tak an nih avangin neitu rilru pu in an hna theuhah rinawm tak leh tui taka thawk turin a chah a. Mi thenkhat ruling party a rinawmna pek tumte hi mi hnawksak leh mi chimawm an ni duh hle a, an hna pawh thawk hman lo a an hun hlu takte an hmanral mai mai thin avangin mipuiin an tuar thin a ni, a ti. Ruling party ah rinawmna pek a ngai lo a ti bawk.

Sorkar Flagship Programme NLUP chungchang sawiin Chief Minister chuan NLUP hi a hlawhtlin ngei theihna turin Line department a mi nilo te pawhin hriatpuia line department dang amite nen thawhhona tha siam turin a chah bawk a ni.

Democracy a peng 3 Legislature, Executive leh Judiciary te a awm thu sawilangin Chief Minister chuan Legislator ten Committee an neihte hi official ten an ngaih pawimawh tawk loh thin avangin inhrilhhriatna tunhnai khan neih a nih thu a sawi a, Mizoram chu ram zimte kan ni a, transfer and posting chungchangah te hian sorkar in min dahna apiang hi an pawm mai tur a ni, tiin kan kal duh lo a nih chuan ban mai pawh kan ngam tur a ni, a ti. Sorkar hnathawkte chu a chhe lai siamthatu tur vek kan nih avangin kan hna theuhah tui tak leh rinawm taka thawk turin a chah nawn leh a ni.

Chief Minister hi a nupui Pi Lal Riliani bakah bialtu MLA Pu Lalrinmawia Ralte, Parliamentary Secretary; Pu R. Lalrinawma, Chairman, Law Commission leh Pu TT Zothansanga, MLA ten an tawiawm a ni.

Chief Minister hian vawiin lam hian Zamuang khuate tlawhin Kawrtethawveng ah a riak ang a, naktuk lamah Damparengpui leh W. Phaileng te a tlawh bawk dawn a ni.