Governor Vakkom Purushothaman chuan vawiin khan nithum awh tur ‘National Seminar Cum Workshop on Suicide-Causes and Prevention’ Pachhunga University College-a neih a hawng. He workshop hi Pachhunga University College leh Mizoram University tangkawp buatsaih a ni a, workshop a tel tur hian West Bengal, Karnataka,Tamil Nadu , Uttarakhand, Pondicherry leh India hmun dang atangin mithiamte an lo kal a ni.

Governor chuan hetiang workshop neih chu a tha tiin rah tha tak a neih ngei a beisei thu a sawi a, Mizoram-ah  kohhran leh tlawmngai pawl ten  heti lama an hnathawh chu fakin theihtawp chhuah zel turin a chah. Mizoram ah kumin January atanga tun thlenga mahni intihhlum 45 an awm tawh thu sawiin Governor chuan hemi veng tur hian kawng hrang hrang zawn a ngaih thu a sawi a. Mahni intihlumte hi rilru lungngaihna leh beidawnna( depression) avang te a ni thin a, chuvangin inenkawlna tha hi a rang lama pek a tul thu Governor chuan sawiin Mizoram hi ruihhlo  luhna kawnga awm a ni a Sawrkar hian hemi dona kawngah theihtawp chhuah zel a, ruihhlo ngaite tan inenkawlna hmun (de-addiction centres) tha neih a tul thu a sawi bawk.

Hawnna inkhawm ah hian Dr. H.K. Laldinpuii, Head, Department of Psychology, Mizoram University in he seminar chungchang a sawi, Pu Lallungmuana, Associate Professor & Head, Department of Sociology,  Pachhunga University College-in inlawmna hun a hmang a. Inkhawmah hianProf LN Suman, Addl. Professor,  Department of Clinical Psychology, NIMHANS, Bangalore-in paper chhiarna hun a hmang bawk a ni.