Chief Minister Pu Lal Thanhawla chuan vawiin khan khawvela Health Care Scheme lian ber Ayushman Bharat – Pradhan Mantri Jan Arogya Yojana (AB-PMJAY) chu Mizorama hman turin a hawng. He scheme hi sawrkar laipuia Ministry of Health & Family Welfare scheme kal lai mek Rashtriya Swasthya Bime Yojana (RSBY) thlak thlengna tura duan chhuah a ni a. India pum tan nimin khan Prime Minister Pu Narendra Modi chuan a lo hawng tawh a ni. AB-PMJAY hawnna inkhawm, Chief Minister’s Office Conference Hall-a neihah hian Health Minister Pu Lal Thanzara, ZOHANDCO Chairman Pu R. Vanlalvena, Dy. Chief Whip Pu R.L Pianmawia leh sawrkar hotulu pawimawh tak takte an tel a ni.

Chief Minister Pu Lal Thanhawla chuan AB-PMJAY kalpui a ni tur chu lawmawm a tih thu sawiin, ramin a chhunga chengte hriselna a ngaih pawimawhzia a tilang a ni, a ti a. Mizoramah pawh health care chu sawrkarin a ngaihpawimawh thu sawiin, sawrkar laipui scheme kalpui mekin a huamloh te chhawmdawl an nih theih nan Mizoram Health Care Scheme a kalpui a lo nih tawh thu a sawia, tunah AB-PMJAY nen Mizoram Health Care Scheme chu thlunzawm a ni thei tur chu a lawmawm hle a ni, a ti. Chief Minister chuan Health care Scheme thar chu a mamawh leh scheme hnuaia awm thei ten zau zawka an hriat a an hman tangkai ngei a duh thu a sawi a. Sawrkar pawhin a tih tur chin awmte pawh ngawrh taka hmaa lak zui tur a sawi a. Chutihrual chuan hriselna lamah Mizo mipuiten hmalakna tur kan nei tam hle a ni tiin Chief Minister chuan hnam hrisel zawk kan nih theih nan mitinin kan theih tawka kan ei leh in kan uluk a, zuk leh hmuam laka kan filhlim a pawimawh hle a ni, a ti.

Health Minister Pu Lal Thanzara chuan “ram mipuiin hriselna tha zawk kan neih theih nana Health Care Scheme changkang leh sum leh pai tam zawk hman theihna, India Sorkar laipuiin a duan thar chu kan chhawr tangkai ve theih dawn avangin, vawiin hi hriselna lam kawnga hun pawimawh leh, mellung pawimawh tak dang kan phun lehna ni a ni” a ti a. Hriselna chu hmasawnna tehfung pawimawh tak mai mithiam te pawhin an sawi thin a ni tiin, ram changkangte an changkanna chhan ber pakhat chu mipui hrisel avang leh, health infrastructure hrang hrang an neih that vangte, health insurance in mipuite a huam kim vangte a nih thu a sawi a. AB-PMJAY chuan natna hrang hrang a huam mai bakah, India ram hmun hrang hranga Empanelled Hospital-ah te hman theih a nih dawn avangin inenkawlna lama harsatna tawkte pawh a awlsam phah a beisei thu a sawi a ni.

MLA Pu R.L Pianmawia leh Pu R. Vanlalvena te pawhin RSBY thlak tura a huam zau zawk leh a bik takin thingtlang mite tana tangkai em em tur theih tur AB-PMJAY hman tura chhawpchhuah a ni ta chu lawmawm an tih thu an sawi a. Mizoram sawrkar hmalaknain he scheme thar hnuaiah sawrkar laipui remtihna in Mizoram Health Care Scheme chu telh a ni ve tur pawh chu lawmawm an ti a ni. He scheme hmang tangkaitu tur la in register lo te pawhin a nachang an hriat a, zau zwka inhrilhhriatna kalpui a nih leh he scheme a taka kalpui kawngah thahnemngaihna leh rinawmna office leh hospital a thawktute atangin an beisei thu an sawi a ni.

Vawiina AB-PMJAY hawnna inkhawm hi Pu K. Sangthuama, Joint Secretary, H&FW chuan kaihruaiin, Dr. Biakthansangi, CEO, MSHCS chuan technical report a pe a. Chief Minister chuan beneficiary thenkhat hnenah AB-PMJAY Golden Record a sem nghal a ni.

AB-PMJAY scheme thar hnuaiah hian chhungkua pakhatin kum khatah Rs. 5,00,000 (Cheng nuai nga) thleng damdawiina an inenkawlna senso an bill thei dawn tawh a. He scheme hi Sawrkar laipui chuan September ni 23, 2018 khan a tlangzarh tan a, Mizoram ah pawh October ni 1, 2018 atanga hman theih nghal tura ruahmanna kalpui mek a ni. Mizoramah chuan Mizoram State Health Care Society, Department of Health & Family Welfare in a keng kawh ang.

AB-PMJAY thil tumte chu Damdawiina inenkawlna hautak avanga harsatna tawh thinte chhawk zangkhai turin leh tun mma aia mipuite sum sen tih tlem zawk te; Awlsam zawka mipuiten damdawiina inenkawlna the zawk an lo neih theih na tur leh a hma aia sum hman tur tihsan te a ni a. AB-PMJAY hmang thei tu te chu (i) Socio Economic Caste Census) 2011 Census List-a tel chhungkua te, (ii) RSBY Smart Card hmangmek chhungkuate leh (iii) Mizoram Sawrkar hmalakna in Mizoram Health Care a inziak lut tawh sa chhungkuate leh kumin October chhung a inziak lutte an ni.

AB-PMJAY scheme hnuaia inziaklut chhungkuate chuan kum khatah damdawi-ina inenkawl nan Rs.5,00,000 (Cheng nuai nga) thleng an bill/ hmang thei dawn a. Natna chi hrang hrang 1390 chuang inenkawl theihna tur leh a zat (rate) bituk sa (package rate) a awm dawn a. Chuvangin Rs.5,00,000 (Cheng nuai nga) bill theih tih ni mahse, natna enkawlna rate (package rate) aia tam a hman theih chuang loh a ni. Heng package rate hian investigation man, damdawi man, in zai senso, chaw, Nursing senso, Doctor Visit senso, etc. a huam tel ang.

RSBY leh Health Care hnuaia chhungkaw member tam lam zat limit (5 chin) awm thin chu tih tawp a ni a, chumi awmzia chu chhungkua member eng zata tam pawh ni se la then hran (split) ngai lovin chhungkaw khatah an tel vek thei tawh a ni. 

He Scheme-a inziak lutte chuan India ram puma Sawrkar damdawi inte leh Sawrkarin a phalsak Private damdawi inah an inenkawl thei dawn. Mizoram ah erawh chuan Sawrkar damdawi in leh Private damdawi in zawng zawnga hman theih turin a buatsaih a ni a. Sawrkar laipui huam bak Primary Health Centre (PHC) ah pawh Mizoram ah chuan AB-PMJAY hamthatna hi a hman theih dawn a ni. 

Damdawi ina inenkawl hian pawisa hman ngai lovin a bathlau (cashless) a inenkawl theih a ni tawh dawn a ni. He Scheme tharah hian Enrollment hranpa a ngai tawh lova, Enrollment Fee hranpa pawh chawi a ngai tawh lo vang. Nimahsela, APL tan erawh chuan kumin October chhung hian la in register lote tan hun hawn a ni dawn a, Register man chu Rs. 1500 (Sangkhat zanga) a ni thung ang. Mahni bial Sub-Centre theuhah ngaihven tur a ni. In register tawh sa tan tih nawn a ngai lo ang.