Vawiin khan Aizawl Civil Hospital-ah Finance Minister Pu Lalsawta'n Level II Trauma Centre sakna tur lungphum a phum a. Hemi hnu hian Health Minister Pu Lal Thanzara'n General & Private Ward Building thar a hawng. He hunah hian MLA - Pu John Siamkunga leh Pu Lalrobiaka an tel a, Health Department hotute, Dawrpui Local Council leh Civil Hospital doctor leh hnathawkte an tel bawk a ni.

Khuallian Pu Lalsawta chuan vawiina lungphum kan phum Level II Trauma Centre  leh General & Private Building hawn te hi mipuite tan a tangkai hle dawn a ni tiin Aizawl Civil Hospital hi damdawi in hlun a nih angin mipuiin kan pan nasa a, hospital tan hian hmasawnna ropui tak a ni, a ti a. Trauma Centre phei chu kan mamawh em em a, accident leh chhiatrupna thlen hunah a pawimawh hle a, nunna tam tak chhanhim theihna a ni, a ti a. 12th Five Year Plan khan zau zawka Trauma Facilities te, National Highways leh State Highways-ah te din a nih thei nan sawrkar laipui chuan ruahmanna thar a siam a, district headquarters tinah Trauma Centre kan neih theih nan dilna theh luh a ni a, district 7-a hmalakna turin sum (1st instalment) pawh min rawn pe tawh a ni, a ti a. Doctor leh nurse te pawimawhna tarlangin trauma centre leh building thar hawn tak te hlawhtlinna anmahniah a innghat thuk hle a ni, a ti a. Khawvel inher zelah natna hrang hrang tunhmaa awm ngailo kan hre chho zel a, heng natnate hi doctor ten an zirchiang thin chu lawmawm a tih thu sawiin inchhiar zau a, hmasawn zel turin a chah a ni.

Khualzahawm Pu Lal Thanzara chuan vawiin ni hi Aizawl civil hospital hmasawn zelna tur leh mipui tana malsawmna tura hmalakna thar, bung thar kaina a ni tiin Health Department mai ni lovin, Mizoram mipui tana hmasawnna a ni, a ti a. Hriselna tha nei turin hmasawnna ruhrel hrang hrang neih that chu thil pawimawh ber zing ami a ni a, NEDP kaltlangin hma lakna tam tak awmin hmanraw changkang tak tak lei a ni a, Building leh Quarters sakna tur te ruahman a ni bawk, a ti a. District hrang hrang hospital tihchangtlun nan kum 2016-17 ah cheng vaibelchhe 9, kum 2017-18 ah cheng vaibelchhe 20 leh kum 2018-19 atan cheng vaibelchhe 20 dah a ni, a ti a. Health Minister chuan Aizawl Civil Hospital hi Mizoramah chuan kan damdawi in pui ber niin theihtawp chhuaha thuamthat zel a ni, a ti a. Building thar - Level II Trauma Centre lungphum kan phum leh General Building kan hawngte hi hriselna lama hmasawnna a ni a, a chhawr tangkai ber ber turte chu mipuite kan ni, a ti. Khum leh cabin-te hi Civil Hospital-ah hian kan indaihlo em em a, khum ruak hi a awm hman meuhlo a ni tiin tuna building hawn tak hi General Building tih ni mahse, kum upa lam tan bika buatsaih niin, a hming pawh Geriatric Ward tih a ni, a ti a. Kalkhawmte hnenah chuan Civil Hospital hi sawrkar damdawi in ni mai lovin, mipuite damdawi in a ni a, mipui ta anih angin khawl leh hmaruate dimdawi taka hman leh enkawl a pawimawh a, a chhiat in a tuartu chu mipui tho kan ni, a ti a. Khawl leh hmaruate a daihrei zawk nan, a enkawltu leh mawhphurtu bakah a hmangtu mipui in helam kawngah hian kan inhrilhhriat a pawimawh hle a ni, a ti.

Mizoram Sawrkar chuan Aizawl Civil Hospital changtlung zawka thuam anih theih nan kum 2006-2007 khan sawrkar laipuiah dilna a theh lut a. Sawrkar laipui chuan dilnate ngaihpawimawhin March 2007-ah cheng vaibelchhe 54.23 hmanga tih changtlunna tur a pawmpui a. Hemi kum vek hian cheng vaibelchhe 10 first instalment atan pein, second instalment hi 2013-2014 chhungin hmuh a ni leh a. Obstetrics & Gynaecology (O&G) building, vertical extension of Radiology building, vawiina hawn tak General Building leh hmanraw dang lei nan hman a ni. Trauma Centre hi accident leh chhiatrupna a thlen huna rang thei ang bera mipui enkawlna tur a ni a. Cheng nuai 621.50 hmanga sak tur niin sawrkar laipui leh NEDP bultum a ni a.Trauma Centre-ah hian khum 20 leh Operation Theatre (OT) awm tura ruahman a ni. General & Private Ward Building hi December Ni 15, 2014 khan sak tan a ni a, June Ni 1, 2018 khan sak zawh a ni a, cheng vaibelchhe 6.02 hmanga sak a ni. Total floor area hi 19609.69 sq ft a ni. Building hi chhang nga (5) niin security room, vehicle parking, CT Scan room, sterilization area, washing area, general ward, nursing station, consultation room (3), research room (4), library, officer's room, dressing room, social worker room, dining hall, treatment room, cabin room (14) leh a dangte a awm tel a ni.

Programme hi H&ME Director Dr. T. Lalhmangaihi chuan kaihruaiin kalkhawmte lawmna thu a sawi a. Trauma Centre leh General & Private Building chungchang report ngaihthlak a ni a. NHM Director Dr. Lalrozama, IAS chuan thusawina hun a nei a. Aizawl Civil Hospital Medical Superintendent Dr. K.L.Remsanga chuan lawmthu sawina in hun a khar a ni.