Vawiin khan National Service Scheme (NSS), Mizoram chuan an din champha vawi 49-na Aizawl Vanapa Hall-ah an lawm a. Higher & Technical Education Minister Pu R.Romawia chu khuallian a ni.
Pu R.Romawia chuan khawvel thang zelah mahnia thil tha pum hmawm duhna lo hluar zel lai hian midangte tana thil tha tih inzirtir uar deuh deuh a tul a, mite tana in phal nun hi hahthlak chang awm mahse nun hausa a ni, a ti a. NSS kaltlanga zirlaite hnenah mi dangte tana inpekna, mi dangte nena inngeih taka nun ho dan leh khawtlang that tlanna tur inzirtirna an kalpui hi thil tangkai leh hlawk tak a ni, a ti. Mizoram chhunga NSS ten thisen pek chungchanga an tha thawh ropui a tih thu te, ram bua zel venna tur leh sik leh sa inthlak chak lutuk do let nena thingphun leh thing ding sa enkawl kawnga an hmalakna te, vantlang mamawh intawm - zun in, ek in, chawlhbuk leh a dangte siam kawnga an tha thawh te, faina inzirtirna leh ram eichhe mektu chin tha lo laka fihlim tura awareness campaign an kalpui thin te chu chhuanawm a tih thu Higher and Technical Education Minister Pu R.Romawia hian a sawi a ni.
Minister hian State NSS Award for Programme Officers and Volunteers, 2017-2018 chu Pu Joseph Vanlalhruaia Sailo, Programme Officer, NSS Unit, Synod Higher Secondary School hnenah a hlan a. NSS 13th Annual Achievement Report 2017-2018 a tlangzarh nghal bawk a ni.
NSS hi kum 1969- ah ding tanin State leh University thlan bikah volunteer 40,000 nen bul tan a ni a. Tun dinhmunah India ramah volunteer nuai 36 an awm tawh a ni. Mizoramah chuan kum 1972 khan Government Pachhunga Memorial College, tuna Pachhunga University College ni ta ah hian din tan a ni a. Kum 1996 atang khan College mai bakah Higher Secondary School zirlaite zingah din chhoh niin tunah hian Mizorama College 26 leh Higher Secondary School 58, a vaiin 84 ah NSS hi din a ni. Kum 2015 thleng khan NSS hi Centrally Sponsored Scheme a ni a, kum 2016 atang khan Central Sector Scheme ah leh niin fund hi Central Sawrkarin za ah za a tum a ni.
Inkhawm kaihruaitu State NSS Officer cum Deputy Secretary Dr Zirlianngura report-a a lan danin kumin April atanga September thla thleng khan NSS volunteers te hian Voluntary Blood Donation camp tum 35 an huaihawt a, thisen unit 2534 an pe a. Thing 2805 phun belhin Lengpui Airport kalkawng Sihhmuiah Tourism Department nen tangkawpin Saron kung 300 an phun a ni. Fai inzirtirna cleanliness drive beihpui thlakin sawrkar leh khawtlang hmun pawimawh, bazar, damdawi in leh khelmualte tifaiin tun thla ruk chhung khan vawi 150 an hnatlang tawh a. Career awareness, human rights, sanitation, legal awareness, HIV/AIDS leh thil pawimawh dang inzirtirna vawi engemawzat an kalpui tawh bawk a. Thingtlang khaw hrang hrang leh khawpui chhungah chawlhbuk, zun in leh khawtlang tana thil pawimawh an siam thin bawk a ni.
