Vawiin khan Chief Minister Pu Lal Thanhawla chuan Indian Council Of Agricultural Research(ICAR) Complex for NEH Region Mizoram Centre, Kolasib-ah Scientist Home, Type IV Quarters, Seed Processing Unit leh Mushroom Spawn Cum Production Unit a hawng a. “ Climate Change: Agriculture Adaptation and Mitigation Strategies in Mizoram” tih thupui hmanga nikhat awh inzirtirna ICAR in a buatsaih pawh a hawng nghal a ni.

Worshop hawnna hi Kolasib ICAR Conference Hall-ah neih a ni a; he hunah hian Chief Minister  Pu Lal Thanhawla chuan  lehkhabu Technological Options for Agricultural Production in Mizoram a tlangzarh a. Lehkha phek thlehthuah Mizorama Bekang chin leh enkawl dan te, Bawng hnutebu na (Mastitis) leh a enkawl dan te, Pa khawi dan tih te tlangzarhna leh Fruit flies trap (Thochim manna) damdawi tuiril te pawh a tlangzarh nghal a ni.

Chief Minister Pu Lal thanhawla chuan ICAR chu India ram tan zirchiangtu pawimawh bik, ei leh bar kawnga thawhchhuah tipungtu leh kuthnathawktute tana a din tirh phat atanga tun thlenga hna pawimawh em em thawk chhunzawmtu a ni a ti a. Vawiina ICAR hmunhma a tlawh chuan phurna thar a pe tih sawiin Horticulture leh Agriculture Department te pawhin an enkawl loneitute thlangchhuak se ICAR Kolasib-ah Darshan neihpui se a tangkai hle ang a ti.

Khawvel mihring pungchho mek zelin fimkhur vak loa hma kan lo lak tawh a vangin khawvel tuamtu boruak a chhe mek zel a, sik leh sa pawh nasa takin a lo danglam chho mek a. Sik leh sa danglam nasa ta lutuk hi khawvel in a ngai pawimawh sawt hle a; India pawh in a ngai pawimawh a; chuvangin, Central leh State Level a Environment & Forest Ministry te chu Climate Change tih dah belhin Ministry of/ Department of Environment, Forest and Climate Change tiin a lo thlak ta hial a ni a ti.

Chief Minister Pu Lal Thanhawla chuan khawvela mithiam te hmaa chona awm mek chu ‘Environment tichhe si lovin eitur khamkhawp engtia thar tur nge?’ tih leh ‘Kan chhehvel boruak engtin nge kan tih thianghlim anga, tuihna engtin nge kan siam ang tih leh ramngaw engtin nge kan neih leh ang?’ tih te a nih thu a sawi a. “Khawvelin a buaipui ; ei leh bar a intodelh, ramngaw humhalh, tuihna siam, boruak tih thianghlim leh a dangte chu NLUP-ah a tel vek a. Khawvela University tha, Minessota University, USA in kan sawm ni lo in min rawn thawhpui hnuah UNO peng 4 te pawh in min rawn thawhpui leh a; NLUP hi a tha tih a chiang a, khawvelin a ngaih pawimawhte he programme-ah hian a tel kim a ni”, a ti. NLUP in ramhal a ti tlem a chu chuan Mizoram in lohal hunlai a nasa taka boruak a tihchhiat thin kha a tlem phah tih a sawi a. Boruak thianghlim tihziaawm kawnga hmasawnna chikhat a ni tiin bawlhlawh(solid waste) paih danah erawh tlem la inzir kan ngai tih a sawi.

Sik leh sa inthlak zel avanga Mizoram a thlai chin mek te zirchian ngai a awm nuala a rin thu sawiin mithiamte pawhin sik leh sa inthlak karah thlai tlo leh thlai thar hlawk tur chi te an ngaihtuah a ngai tih a sawi a. Sik leh sa inthlak avanga thlai, buh leh bal thar kawnga harsatna lo thleng thei te zirchianna leh harsatna hlawhtling taka lo dolet dan te pawh research nen bihchian a ngai a ni a ti. ICAR in hemi kawnga inzirtirna a buatsaih chu thil tihawm tak a ni tih sawiin Mizoram Sawrkar hnuaia mithiamte pawhin hemi kawngah hian nasa leh zualin an ngaihtuahna te seng se a lawmawm hle ang a ti.

Chief Minister Pu Lal Thanhawla chuan India rama Planning Commission thlaktu NITI Aayog in Mizoram chu sawrkar hmasawn ber 4 zingah a dah tih a sawi a. “GSDP ah titha ber 4 zingah a telh bakah Mizo chu eitur khawpkhamlo tlemna ber(Least malnourished state) ah a puang a. Chuvangin kan thawk tha thawkhat tih a chiang a ni. Amaherawh chu tun aia nasa zawk hian kan la ti thei tih a chiang a; kan sawrkar hnathawkte an tan leh zuala kuthnathawktute an vil that phawt chuan Kolasib District ringawt hian Mizoram khamkhawp thlai a thar thei tih hi mithiamte chhut dan a ni a. Thil pawimawh tak chu - kan state thenawm atanga DDT leh rannung thahna tur chi hrang hranga chawm thlai kan la lut hi tihtawp vat a ngai a kan hriselna in nasa takin a tuar tawh a ni”, a ti a. Organic State nih chu Mizoram hmabak a ni a ti.

Chief Minister chuan kuthnathawktute chu ram innghahna an nih angin Mizoram sawrkar pawhin a ngai pawimawh a; anmahni lamtang NLUP leh NEDP te a chhunzawm zel dawn bakah Fur chhung pawha hman theih turin Agriculture Link road te pawh All Weather Road a tih changtlun mek a ni a ti. Mizoram chhunga thlai chi bik te chu hun remchang hmasa ah State Seed Committee din in vawn that a ni ang tih a tarlang bawk.

ICAR programme-ah hian Khualzahawmah Pu P.C. Zoram Sangliana, MLA, Chairman, MIFCO, Pu Hmingdailova Khiangte, MLA leh Dr. N. Prakash, Director, ICAR,  Meghalaya, Kolasib bawrhsap Pu Zarzosanga leh Pu RK Srivastava, GM, NABARD, Aizawl te bakah District  hrang hranga Agriculture lama hotute an tel a. Technical Session-ah Scientist chhuanawm tak tak ten zirtina an pe a ni.