DIRECTORATE OF INFORMATION & PUBLIC RELATIONS, Government of Mizoram, India

Vawiin chawhnu khan Lunglei DC Conference Hall-ah Lunglei District Development Coordination and Monitoring Committee (DISHA) chu an Chairman Pu C.L. Ruala, MP Lok Sabha kaihhruaina hnuaiah an thukhawm. He Committee-ah hian Pi Lalzarmawii, IAS, Deputy Commissioner, Lunglei, Pu K. Lalrohlua Project Director DRDA leh Sawrkar official te bakah VC, YMA leh MHIP aiawh an tel a ni.

DISHA Chairman Pu CL Ruala chuan kalkhawmte kumthar chibai bukin thinlung thar leh inpekna thar nen mahni hna theuh thahnemngai taka thawk chhunzawm turin a chah a. Kalkhawmte chu thingtlang mirethei leh chanhaite chhawmdawl hna thawk an ni tih hre thar leh tura chahin Lok Sabha MP chuan mahni hnathawhna kawng ah sulhnu tha tak hnutchhiah thei tura theihtawp chhuah turin a fuih a. Lunglei District tih hmasawnna kawnga mawhphurhna pawimawh tak an chan avangin Department hrang hrang hotute chu inhriatthiam tawnna boruak tha hnuaia tan la tlang zel turin a fuih bawk. Tlawmngaipawl hrang hrang hruaitute leh khawtlang hruaitute chu an vei zawng apiang inthlahrung hauh lova sawi lang thin turin a sawm bawk.

Meeting ah hian kumin sawrkar kum kal mekah MGNREGS hnuai ah ni 47 inhlawhna siam niin September 2017 thleng a Lunglei District chhunga job card nei mi 35517 an awm tih tarlan a ni a. DISHA Chairman Pu CL Ruala chuan MGNREGS inhlawhna tam zawk Mizorama pek chhuah a nih theih nan Sawrkar Laipui hotute a hmuh thu leh MGNREGS sum chungchanga harsatna awm te an hnena a thlen thu a tarlang a ni. Individual House Hold Latrine hnuai a ekin sak tur 950 ah 690 sak zawh tawh a ni. Kawngpui dung ah km 82.23 thing phun a ni. Anganwadi Center 20 sak turah 11 peih fel a ni tawh bawk. Lunglei District chhungah PMAY-G hnuai ah in 865 sa tura ruahmanna siam mek niin PMKSY (WD) hnuaiah Project pahnih kalpui mek a ni

PMGSY hnuaia kawng siam hna kal mekah Thingfal to Mamte Road leh Tawipui N to S Mualcheng Road hna te zawhfel tawh niin tun dinhmunah Tlabung to Diblibagh Road, Mauzam to Puankhai Road leh S. Vanlaiphai to Muallianpui Road-te thawh chhunzawm mek an ni. P&E Department hnuaia Deen Dayal Upadhyay Gram Jyoti Yojana (DDUJY) hnuaiah khaw pali ah eng pek tur kalpui mek niin Integrated Power Development Scheme (IPDS) pawh chak taka kalpui mek a ni.

Kum 2016-2017 chhung in Lunglei District ah Nausen piang hlim thi 42 an awm a, Infant Mortality Rate chu 18/1000 a ni a, kumin April atanga December chhung in nau piang hlim thi 27 an awm a, IMR hi 15/1000 a ni. Hemi chhung hian nu nau chunga thihna pakhat a thleng a ni. Malaria vei mi 1330 zingah mi 1188 te chu Malaria Pf niin Denque vei mi sawmpathum hmuhchhuah an ni. Kumin chhungin Medical Mobile Unit 27 neih tawh a ni. Kumin April atanga December chhung in mi 2645 Blood Test te zingah mi 48 HIV positive hmuhchhuah an ni.

SSA Mission Mid Day Meal hnuaiah School 552 awmin zirlai 28,783 ten Mid Day Meal an dawng. Swachh Bharat Mission (Gramin) hnuai ah IHHL Lunglei block ah 1376, Hnahthial block ah 598, Bunghmun Block-ah 1044 leh Lungsen Block-ah 2878 sak a ni. ICDS hnuai ah tar pension 5,265 te hnen ah pek an ni a, naupang kum 6 hnuai lam te tan nutrition pek an ni bawk. Social Welfare Department hnuaia Vocational Training in Tribal Area hnuaiah mipa 17 leh hmeichhia 64 ten training an nei tawh bawk.

Hengte bakah hian District chhunga hmasawnna hnathawh dang engemaw zat en ho a ni bawk.

Attachment