Tukin zing dar 10:30 AM khan Chief Minister Pu Lal Thanhawla chuan Kolasib-a Circuit House chu a mamawhtu apiang ten tangkai taka an hman theih atan a hawng a, Circuit House hawnna hriatreng nan Chief Minister te nupa in Circuit House tual ah Herhse kung an phun ve ve a. Circuit House hawnnaah hian Chief Minister hi Parliamentary Secretary leh Serlui bialtu Pu K. Lalrinthanga leh MIFCO Chairman leh Kolasib bialtu ni bawk Pu P.C. Zoram Sangliana ten an tawiawm a. Hemi hnu hian Circuit House hawnna puala inkhawm chu Diakkawn YMA Hall ah buatsaih zui nghal a ni.

Chief Minister Pu Lal Thanhawla chuan Kolasib District-a Deputy Commissioner kaihhruaina hnuaia Department hrang hrang ten khawtlang hruaitute nen thawhho tha tak an nei chu tha  leh lawmawm a tih thu sawiin Sawrkar kutke pawimawh tak chu mipui te an ni a, an tana rawngbawlna hna kan thawh leh kawng hrang hranga kan kaihhruai hi Sawrkar hnathawk leh a fawng vuantu te mawhphurna pawimawh tak a ni, a ti. Eng hnathawk pawh nih ila, kan awmna apiangin hi Pathianin a rawngbawl tura min hunna a ni tia kan pawm a, dikna leh takna nen hma la a, midangte tan malsawmna ni turin ka chah duh che u a ni tiin he huna mipui kalkhawmte chu a chah.

Pu Lal Thanhawla chuan remna leh muanna champha vawi 30 na naktuk maia hman tur chungchang sawiin  rambuai kha politics buaina a ni a, sipai leh silai hmanga senghawi chi a ni lova, inbiakna leh politics hmanga senghawi chi a ni a, a ti a. Ram buai chhoh dan chanchin te sawiin leh hmutsitna, deusawhna leh elrelna karah remna leh muanna atana hma latu te leh Kohhran te inpekna leh hnathawh chu ropui a tih thusawi bawk.

Zofate hi Pathianin laka mibik kan ni tih kan hriat ka duh a tiin Chief Minister Pu Lal Thanhawla chuan thingbul lungbul be thin te chu zawngchhuak in hun reilo tea Zofa hmun hrang hranga chengte chu Chanchin Tha in tuamin Kristian ah kan awm veka, khawvel sakhaw lian ber ber ten Zofate chenna chu an hual chungin a hnam tlanchhuahte kan ni a, hei hi kan hriat renga, amah chawimawi a, a thinurna ni lo, a malsawmna leh a zahngaihna tawngbaw tura kan khawsak a pawimawh a ni, a ti.

NLUP chungchang sawiin Chief Minister chuan NLUP hian sum leh pai leh ei leh bara intodelhna thlen a tum  piah lamah khawvel lum chho mek global warming tih ziaawm te, tui hna kang chat mekte siam that  leh ram ngaw chereu tur ven te a fuan kim a, hengte hi UNO lam te leh University hmingthang University of Minnesota te chuan tha tiin an rawn zirchiang a, tunah chuan UNO agency pali inzawmkhawmte chuan Aizawlah pisa neiin an in bun tawh a, University of Minnesota te pawhin Mizoram University nen thawhhona thutlung an nei a, sumdawng lian Tata te pengkhat Tata Trust leh Godrej te chuan hma an rawn la mek bawk a ni, a ti.  Hengte hi NLUP thawhrah anih thusawiin NLUP hi Pathian lam tang programme anih vangin a tira NLUP sum dil aia tam khatih laia Sawrkar Laipui chuan an rawn ruahman a, hei hi Pathian malsawnna kan dawn ropui tak a ni, a ti bawk. NLUP dawngtu te kaihhruai chu Line Department te mawh chauh a nih loh thusawiin beneficairies te enpui, vil, fuih leh thlithlai hi sawrkar hnathawk zawng zawngte mawhphurhna a ni tih kan hriat a pawimawh a ni, a ti. Mipui kalkhawmte chu a chhe lai siam that chu Sawrkar mawh leh mipui mawh angkhat anih thu hrilhin ram leilung faten neitu rilru pua kawng engkima kan thawhho a ngaih thu a sawi bawk.

He huna thusawitu dang Parliamentary Secretary Pu K Lalrinthanga chuan hun reilo te chhungin Mizoramah kawng hrang hrangin change a thleng a, hengte hi mipuiin kan dawnsawn thiam a, ram hmasawnna kawnga theihtawp kan chhuah tlan a tul thu a sawi a. MIFCO Chairman Pu P.C. Zoram Sangliana chuan remna leh muanna  hlutzia sawiin remna leh muanna hi hmasawnna atan thil pawimawh ber a ni, a ti. Programme kaihruaitu Kolasib DC Pu H. Lalengmawia, IAS chuan District chanchin te sawiin kawng hranga Kolasib District hmasawnna te a tarlang a. Circuit House sak chanchin tlangpui Technical Report hi Chief Engineer PWD (Building) Pu Lalmuankima Henry in a sawi a. Pi Maria CT Zuali, Director SIRD chuan lawmthu sawiin programme a khar a ni.

Circuit House Kolasib hi March ni 7, 2007 khan sak tan niin October ni 24, 2011 khan sak zawh a ni a, a sak nan a sum ruahman hi cheng nuai 239.54 a ni. Circuit House hi basement tiamin chawng li a ni a, VIP room pahnih leh guestroom 17 a awm a. Conference Room leh Lounge te pawh a awm bawk a. Basement zau zawng hi square metre 109.40 niin Cook Quarter leh Chowkidar Quarter te a awm a. Ground Floor zau zawng hi square metre 359.40 niin Lounge, Conference Hall, Guest Room 3, Dining Hall leh Toilet a awm a. First Floor zau zawng hi square metre 337.40 niin Guest Room 9 (Double Bedded) a awm a. Second Floor ah hian VIP Room 2, Semi VIP Room 4 leh Guest Room(double) 1 awmin a zau zawng hi square metre 337.40 a ni.

Circuit House hawnna programme zawh hian Chief Minister Pu Lal Thanhawla chuan Kolasib Press Club sak thar cheibawl mek chu a tlawh bawk a ni.