Chief Minister Pu Lal Thanhawla chuan nimin khan Kolasib Venglai a Sports Stadium sakna tur lungphum a phum.

Chief Minister chuan hmasawnna tur atana ram kalsiam chho zelah rahbi pawimawh tak, stadium sakna tur Kolasib khawtlangin phal taka ram an pe chu a lawmawm takzet a ni a ti a. A khawtlanga lawm nachang an hria chu a entawntlak hle a ni a ti. Sports infrastructure ah thalaiten rual an awh lohna turin sorkarin chak takin hma ala chho mek zel a ni a ti a. Stadium hi a hmangtu tur thalaiten khawtlang nun siam nan leh Zonun zemawi par chhuahtir nan tangkai taka hmang turin a chah a. Chak taka hnathawh anih theih nan a satu turte chu phur taka tawiawm thin turin mipuite chu a chah a. Sorkarin sports hi infiamnaa thiamna chherchhuahna mai nilo, eizawnna tling leh hausak theihna ni turin chak takin a kalpui chho mek a ni a ti. Kum 2016 Olympic a Mizo thalaite kan tel ve theihna turin Olympic Vision 2016 chu chak taka kalpuiin, kan theihna discipline ah zirtirna leh incentive te kalpui mek a ni a ti a. Hma kan sawn dawn chuan kan zavaia kan tan tlan a tul tiin, a chhe lai siamthatu tur vek kan ni a ti.

Chief Minister chuan hmasawn nana sum mamawhte hi a dila dil chhuah a ni a, sum zem atang va thal chhuah a nilo tiin, a petu thu a ni a, chuvangin indem thei kan nilo a ti a. Sorkar hian kan ram leh hnam hmasawnna turah kan chiang a, a kawng kan hria a, kan arkhawthim dai ve mai mai lo a ni a ti a. Amaherawhchu, hmasawnna tur project lian kan kalpuinaah a ram leilung fate ngeiin harsatna kan siam nasa thin chu a vanduaithlak hle a. Kuttlinglova sum lak pawisak lohna avangin kan kal chak theilo a ni tiin, Tuirial Hydel Project chu tih thuanawp der a ni a, Bairabi atanga Sairang thleng rel kawng siam turah compensation avangin siam zawh hun tura tih pawh nasa taka tih khawtlai a ni a, Bay of Bengal a chhuahka kan neih turah pawh motor kawngpui siamnaa ram a paltlang tur, ram palailengte chu compensation avangin harsatna tam tak a awm a ni a ti. Ringtu ni si te hian sim tur kan ngah hle a, sum ngainatna bawihah kan tang ang tih a hlauhawm hle a ni a ti.

Inkhawm kaihruiatu Pu Zodintluanga, Minister for UD&PA chuan kum 2008 atangin ni chhinchhiah tlak tam tak kan nei chho mek a ni a ti a. Chief Minister hmalaknain district tinah thalaite tuihalna tireh turin stadium puitling sak chhunzawm zel tum a ni a ti.

State Planning Board Vice Chairman Pu H.Liansailova chuan sum harsatna kan sawi reng chung hian sports infrastructure siamna chu a kal cho mup mup reng tho a ni a ti a. Keini anga thang chak state dang an awm ve a rin loh thu a sawilang bawk a ni.

Bialtu MLA Pu P.C.Zoram Sangliana chuan ‘he stadium kaltlang hian Mizo thalaiten khawvelah min pho chhuak ngei ang tih ka beisei tlat a ni’ a ti bawk.

Sports Stadium sak tur hi Mizoram sorkarin ni 23.5.2014 khan Union Ministry of Urban Development ah DPR thehlutin, ni 8.10.2014 vek khan a sakna tur Rs.2268.43 lakhs a rawn santion a. A enkawltu tur Nodal Agency chu Urban Development & Poverty Alleviation (UD&PA) Department, Govt of Mizoram a ni a, a satu tur hi National Biuldings Construction Corporation (NBCC) Ltd. a ni. Thla 32 chhunga zo tura ruahman a ni a, a plot area hi 22886.13 Sqm a ni. Stadiumah hian football ground FIFA Standard phullem phah ani ang a, 8-lane synthetic running track siam a ni a bawk ang. Heng bakah entu mi 1500 thutna tur gallery, VIP mi 100 enna tur hmun leh gym, boxing, mipa leh hmeichhe tan a hranin players’ room, 2 wheelers 200 tan leh motor te 50 tan parkingna hmun te leh inthiarna hmun 8 siam ani bawk dawn a ni.