Vawiin nileng khan Environment & Forest Department huaihawtin Pachhunga University College (PUC) ramngaw ah Environment & Forest Minister Pu Lalrinmawia Ralte hovin World Forestry Day, 2015 hman a ni.

World Forestry Day pual a programme buatsaih hi PCCF & Principal Secretary Pu Lal Ramthanga’n a kaihruai a. Programme chhimtute hian mithiamte hnen atangin ramngaw pawimawhna leh ramngaw chereu in sik leh sa, ei leh bar bakah mihring khawsak phung a nghawng dan an ngaithla a. He mi ni puala E&F Department in inelna chi hrang hrang a buatsaih taka lawmman dawngtute hnenah lawmman tangkafai leh chawimawina thuziak semna hun hman a ni a. Botany department, PUC in par chhuahlo ramhmul chi hrang hrang an college ramngaw hnuaia an hmuh chungchang zirchianna lehkhabu an buatsaih chu Minister hian a tlangzarh nghal a ni.

World Forestry Day programme a thusawitu Environment & Forest Minister Pu Lalrinmawia Ralte chuan ramngaw humhalhna hian kan tu leh fa te hnuk a khawih tak meuhva, rual u zawk leh pi leh pu ten ngaih pawimawh nachang an hre tawk lo anih pawhin tunlai thalaite chuan kum tam tak an la hman tangkai tur ramngaw humhalh beihpui thlakna ah hian thlirtu ni mai lo turin a ngen a. Mahni eizawnna leh nunna nena inzawm tlat ngaihhlut nachang pawh hre lo chu upa emaw rual u zawk an nih pawn neitu chan changtu tur zawk thangthar te chuan an khap ngam turah ka ngai a ni a ti. Mizoram ah khaw 700 vel chuang a awm a, heng khua leh a chheh vela hmun hring awm tawh phawt mai tihchingpen tumna rilru a la awm hi a rilru nat thlak tak meuh a ni a ti a. Tuihna a tlem nachhan te, khua a lo lum zual nachhan te, sik leh sa mumal loh chhoh nachhan te hi ramngaw chereu nen a in zawm tih hi hriat thar leh a ngai tak meuh a ni a ti a. Heng hrehawmna tam tak te hi kan insiam chawp a ni a, a siamthat hna pawh kan kutah a awm tiin ramngaw humhalh ah harhna Mizoram in a mamawh a ni a ti a. Kan inthlahdah chhunzawm zel chuan kan tu leh fa, mizo naupang lo la awmtur te hi thlaler nisa hnuaiah kan tah tir ang tih a hlauhawm a ni a ti.

World Forestry Day puala intihsiakna hrang hrang result puan a ni a, a ti tha zual thlanchhuah te hi lawmman tangkafai leh chawimawina thuziak pek vek an ni. Thlalak huang hi pathum ah then a ni a ; SLR category ah Pakhatna, Vanlalbiaksanga Sailo, Upper Kanan, Aim & Shoot Category ah Zakhuma, West Phaileng, Mobile Phone Camera thlalak ah K. Lalduhawmi, Armed Veng South. Article inziahsiak ah Lalhmangaihzela, Pehlawn in pakhatna a la a, Slogan inphuahsiak ah B. Lalthlengliana, Saron Veng chu pakhatna a ni thung. World Forestry puala Short Film category ah Mission Vengthlang branch KTP chan, “Tukloh Ram” chu pakhatna ah thlan niin Best Actor J.Lalrinsangi, Riakmaw Drama Party, Best Director H. Lalnunsiama, Mission Veng Br. KTP leh Best Script Writer ah PC Lalrinpuia, Mission vengthlang Br. KTP te thlan an ni. Inelna hrang hrangah hian lawmman siam vek a ni a, a sang pathum bakah consolation prize dawngtu te pawh thlan an ni. SLR, Aim & Shoot leh Mobile Camera category a Pakhatna dawngtu te hian Rs. 8,000/-, Rs.4,000/- leh Rs.3000 an dawng a. Rs.3000/- article ziak thiam ber in a dawn lain slogan phuah thiamber in Rs.2,000/- a dawng a ni. Short Film a tithaber hnenah Rs.30,000/- pek a ni a Rs.27,000/- leh Rs.25,000/- pahnihna leh pathumna ten an dawng thung.