Vawiin khan Chief Minister Pu Lal Thanhawla chuan Lai Students’ Association (LSA) in zirlai thar lawmluhna programme Fresher’s Social leh zirlai ti tha te chawimawina Felicitation programme Vanapa Hall a an buatsaih chu khuallian niin a hmanpui a, he hun hi Lai Autonomous District Council (LADC) Chief Executive Member (CEM) Pu V.L Hmuaka leh a thawhpui LADC Executive Member dang pahnih te pawhin an hmanpui a ni.

Chief Minister Pu Lal Thanhawla chuan hmun hrang hranga awm Zohnahthlak te hian tawng hran kan nei a, heng kan tawngte hi vawnghim chho chungin insuihkhawmna atan Duhlian tawng kan hman a tha a, min phuarkhawmtu Duhlian tawng atan theihtawp kan chhuah hi a pawimawh a ni, a ti a. Zohnahtlak te hi Ringtu nihna in min phuarkhawm a, inpawh taka, inhmangaih leh inpui tawn a, inlaichinna leh in unauna thuk zawk kan neiha kan insuihkhawn zel chuan hnam ropui leh zahawm kan ni thei a, midang te lakah kan zuamawm loh thei dawn a ni, ti a. Mizoram leilung fate hi India ramah chuan minority kan ni, nimahsela Zoram leilung fate hi Zoram chhungah tumah hi minority kan awm lova, tumah mikhual awm lovin, a neitu vek kan ni a, ram siamna kawngah mawhphurhna inchen kan nei theuh a ni tih hi kan hriat a tha ani, a ti.

Pu Lal Thanhawla chuan Zohnahthlak ram luah chin chu khawvela sakhaw lian ber ber pathum ten an hual thute sawiin hei hian Pathian lakah Zohnahtlak te hi kan special hle a ni tih a lantir a, hei hi hriain eng hna pawh thawk ila, khawiah pawh awm ila A ram ropuina, A ram zauna atan leh A rawngbawl tur atan min hunna a ni tia pawm a rinawmna, dikna, taihmakna leh Amah thihna nung nen kan kal zel hi a pawimawh a ni, a ti. Act East Policy inher chho mekah India in Mizoram a hawi mek thu sawiin ram dang nen insumdawntawnna kawnga chak taka hma lak mek a ni a, insumdawn tawnna hian Chanchin Tha hrilna kawng leh a putdarhna kawng a hawn dawn a, Ringtu kan nihna angin hei hi kan hriat theuh a pawimawh a ni, a ti.

Mizoram Sawrkar in thalai leh zirlai te hmakhua ngaihtuahin thalai te tan khawvel thar a buatsaih mek thu sawiin MYC kaltlangin thalai tam ten Mizoram pawnah hna an hmu a, thalai te tan infiamna ruhrel siam belh mek zel a ni a, hengte hi chhawr tangkai turin zirlai leh thalai te ka chah duh che u a ni, a ti a. Mizorama Sawrkar hna a van tawh thu sawiin ram danga thawnchhuah leh chhawr theih tur zirna tha export quality education leh mahni kea dinga eizawnna neih self employment te hi kan ngaihpawimawh a hun tawh tiin hengte tan hian Sawrkar chuan theihtawp a chhuah mek thu a sawi a. Quality education atan zirlai te pawhin engemaw chen mawhphurhna an koa a awm a ni tih hria a, an zirna kawnga inpumpek turin a chah a. Zirlai kalkhawmte chu an kal zelna turah duhsakna hlanin ruihhlo tin reng laka fihlim turin leh an chhung lam leh pawn lam nun uluk a an zirna kawnga theihtawp chhuah turin a fuih a. Sap tawng bakah India khua leh tui kan nihna angin rilru zau tak pua Hindi tawng zirna lam ngaihtuahna hmang turin a chah bawk a ni.

LADC CEM Pu VL Hmuaka chuan Chief Minister in District Council te a hmangaih leh a duhsak thute leh harsatna an neih te a sutkian sak zel thute sawiin zirlai te chu ram leh hnam tan theihtawp chhuah turin a fuih a ni.

LSA hian Chief Minister hi Lai shawl an hlan a, Chief Minister in LSA chu computer set khat a pek tur thu a sawi a. LSA Member zirna kawnga hlawhtling fal bik mi 19 te hnenah LSA in lawmpuina thuziak an buatsaih chu he hunah hian a hlan bawk a ni.