Thlichhia leh ruahpui nasa tak avanga tun inrinni zingkara Laipuitlanga chhiatna nasa tak a thlen chungchangah ChiefMinister Pu Lal Thanhawla chuan vawiin khan mipui te hnena TV a tihchhuah turin thuchah a  siam a. Chief Minister chuan Laipuitlanga chhiatna rapthlak tak thleng chu a vanduai thlak tak zet a ni, a ti a. He vanduaina hi a hriat veleh a thawhpui Minister leh MLA dangte nen a hmunah an kal nghal thu a sawi a. A bial chhung Thenzawla thli leh ruahpuiin chenna in 20 dawn a tihchhiat avanga a hmuna enfiah tura a kal thu sawi  bawkin, chanchin erawh chhiatna hmun thutchilh rengtu Minister ten an hrilh reng a ni, a ti a. Pu Lal Thanhawla chuan chhanchhuah hna thawktu State Disaster Response Force te, tlawmngai pawl YMA leh tlawmngai thawktu zawng zawngte changah lawmthu a sawi a. Chhanchhuah hna thawktute tibuai lova, thuawih taka mipuite an inthunun avangin lawmthu a sawi bawk a ni.

Chief Minister chuan  he chhiatna thlenna chhan mawhphurtu chhui tur hian Magisterial Inquiry din anih thu sawilangin, a chhui turin Aizawl District Bawrhsap Pu Franklin Laltinkhuma chu ruat a ni tiin, ni sarih chhunga report thehlut tura hriattir a ni a ti. Chief Minister chuan mitthi chhungte hnena sorkar-in  ralna, ex gratia a pek theih chu Rs.1.5 lakhs anih thu sawiin, hliam tuarte hnenah tanpuina sum an hliam nasat dan azira pek theih anih thu leh in chhia tanpuina chu Rs.35,000/- a ni a ti a. Tunah hian sum pawh sanction tawh anih thu a sawi bawk a ni. Chief Minister chuan chhiattawkte hnenah sorkar-in tanpuina leh chhawmdawlna a theih chin chinah a ngaihtuah sak chho zel dawn a, chuvangin thlamuang taka awm turin a chah.

Thlichhia leh ruahpuiin Mizoram hmun hrang hranga chenna in a tihchhiat leh leimin a siam thu te Chief Minister chuan sawilang bawkin, tunah hian district tin atangin chanchin kimchang hriat belh zel a ni a ti a. Khawchin zirmi ten thlichhia na tak, ‘Mahasen Cyclone’ tia an vuah chu a tleh mai theih thu an sawi avangin mipuite lo inralring thiam turin Pu Hawla chuan mipuite a chah bawk a ni.