Aizawl Laipuitlang venga chhiatna thlen chungchangah vawiin khan Chief Minister Pu Lal Thanhawla hovin a office chamber-ah sorkar hotulute nen sawihoin hmalak zel dan tur an ngaihtuah.

Meeting-ah hian he chhiatna thlen avanga a mawhphurtu chhui chhuak tura Magisterial Inquiry din chungchangte, mitthi chhungte hnenah ralna ex gratia Rs.1.5 lakhs pek theih anih thu te leh in, pucca building chhe vek neitu hnenah Rs.35,000/- tanpuina pek theih anih thute sawilan a ni a. Chhiatna hmuna chhanchhuaktu pawl State Disaster Response Force chu MAP Battalion leh IR Battalion te atanga thlangin, kum 2010 May - June thlaa CTI Sesawngah chhanchhuah hna zirna, training buatsaih tan anih thute tarlan a ni bawk a.Tunah hian mi 376 in training an nei tawh a ni. Chief Minister chuan police te mai bakah Engineer te leh departmental mite pawhin training nei ve se tha a tih thu a sawi.

Chief Minister-in meeting-a tel tura a koh, Science and Technology hotute chuan khawchin zirmi, Meteorological Centre, Guwahati te nen an inbiak pawh thu sawiin, thlichhia na tak tleh mai thei ‘Mahasen Cyclone’ tia vuah chuan Mizoramah ni 16 May 2013 thla hma chuan ala hlauhawm loh tur thu an sawi a, cyclone chet dan hi englai pawha thlithlai reng anih thu sawi bawkin, Mizoram alo thleng anih pawhin a chakna tam tak chu a hloh tawh ang, an ti a. Hemi thlichhia tleh tur chungchangah hian Chief Minister chuan mipuite lo inralring thiam turin a chah a ni.

Meeting-ah hian Chief Secretary charge latu Pu Ashwini Kumar, Principal Secretary to Chief Minister Pu Lalram Thanga, DGP Pu Alok Kumar, DM&R Secretary Pu P.C.Lawmsanga leh Chief Scientific Officer Dr.Vanlalzara leh Press Secretary to Chief Minister Pu L.R.Sailo te an tel a ni.