Kar kalta Inrinni May ni 11 zing lama Aizawl Laipuitlang leh Ramhlun Venglai-a chhiatna rapthlak tak thleng avanga ruang la hmuh chhuah loh leh chhanchhuahna hna chu vawiin chhun thleng pawh khan ngawrh taka thawh chhunzawm zel a ni. Chhiat tawhna hmunah hian sorkar mi pawimawh Speaker, Deputy Speaker, Chief Minister leh Minister te, Parliamentary Secretaries, MLA leh political party hrang hrang hotu te’n a hmunah thutchilhin thil awm dan an vil reng a. Police, DM&R, sorkar department hrang hrang te leh tlawmngai pawl ten a tul ang apiang thawk turin an thlithlai reng a ni. Hei bakah hian Mizoram Police te training pe a cham mek National Disaster Response Team, Kolkata atanga mithiam te chuan an hmanrua te nen chhanchhuahna hna thawktute nilengin an puibawm reng bawk a ni.

Vawiin tlai dar 4 thlenga thu dawn danin he chhiat tawhna atanga boral, an ruang lak chhuah tawh te chu - H.Lalthasanga (31) s/o H.Sangzela, Ramhlun Venglai; Lalrelfela (20) s/o Lalsailova Sailo, Ramhlun Venglai; H.Lalnunmawia (42) s/o Romawia, Ramhlun Venglai; Lalmuanpuii (17) d/o V.Johana, Thingfal; V.Johana (45) s/o Thawngduna, Thingfal; Zothanpuia (19) s/o H.Lalremkima, Thingfal; Lalrindika (16) s/o H Lalremkima, Thingfal; Lalduhsaki (31) d/o V.Vanlalhmuaka, Laipuitlang; Melony Lalhriatchhungi (12) d/o V.Vanlalhmuaka, Laipuitlang; Hmingthanpuia (21) s/o Roneihchhunga, Rabung; V.Lalthafeli (18) d/o Lalbela, Rabung; Lalramnghaki (25) d/o Lalbela, Rabung; Lalrindika (18) s/o Biakchungnunga, Rabung; Lalrinzuali (22) d/o Mangkhuma, N.Khawbung; leh Jakir Jussein (23), Karimganj te an ni.

He chhiat tawhna hmuna chin hriatloh la awm te chu Vanlalrema Hnamte s/o Liankhuma, S. Lungpher leh Lalremchhungi d/o H.Lungmuana (L), Thingfal te an ni.

Leimin avang hian in 11 a chhe vek a, lirthei ke pali nei 7 leh ke pahnih nei 9 a chhia a. YMA Information Centre Laipuitlangah mi tlawmngaite atangin tanpuina sum cheng nuai 5 chuang a lut tawh a, Ramhlun Venglai YMA Information Centre-ah tanpuina sum cheng nuai 4 chuang a lut tawh bawk.