Chief Minister Pu Lal Thanhawla chuan nizan khan ni 4 chhung awh tur Lairam Gospel Centenary Lawmna Central YLA Field, Lawngtlai-ah centenary banner pawtpharhin a hawng.

Chief Minister chuan centenary lawmna huaihawttu Lairam Isua Krista Baptist Kohhran-in an member anga tel tura an sawm chu lawmthu a sawi a. Kristian vek kan nih angin kohhran dang member-te hi mahni kohhran mi anga kan pawm thiam a pawimawh a, hei hian kohhran inzawmkhawmna tha a thlen thei a ni a ti.

Chief Minister chuan Zofate hi thingbul lungbul be thin, khawvela sakhua lian ber ber Hindu, Buddhist leh Islam ten min karcheh chung pawhin Pathian-in Chanchintha hmangin min rawn zawng chhuak a ni, a ti a. Chuvangin mihringte hnenah chauh nilo, A thil siam zawng zawng, thing leh mau te, ramsa te, luia sangha te leh chungleng sava te hnenah chanchintha hril tura koh kan ni, a ti. Malsawmna kan dawn te hi midangte tana malsawmna thlentu ni tura pek kan ni a, tam leh zual kan dawn theih nan ringtu kan nih angin tih tur tam tak kan nei a ni, a ti.

Gospel Centanary-ah hian ngaihtuahna thar nei tura chahin Pu Hawla chuan ringtu kan nih angin khawvela hrisel ber nih tum te, ei leh bara intodelh te, sum ngaina mi kan ni em tih ngaihtuahte leh kan nitin nunah kristian dik tak kan ni em tihte inenchian nan hmang turin kohhran-mi kalkhawmte chu a chah a ni.

Lairam Gospel Centenary lawmna hian kohhran zawng zawng a huap vek a, kum 1912 a Khamchungbuk, Mampui ( Lawngtlai atanga 18 Kms) hmunah Chanchintha hi a thleng a ni. Kum 100 lawmnaah hian Myanmar atangin Global Chin Christian Fellowship palai te, Asia Pacific Baptist Federation, Shillong atang te, Manipur atanga Meitei, Vaiphei leh Lamka Baptist kohhran palaite bakah Presbyterian Church of India aiawh, BSI, Aizawl, Baptist Church of Mizoram, Evangelical Church of Maraland atang tein palai an tel a. Mizoram sorkar atangin Pu H. Zothangliana, Parliamentary Secretary leh Pu PL Thanga, Member Secretary, State Planning Board leh MLA Pu C. Ramhluna te an tel bawk a, Mara Autonomous District Council leh Lai Autonomous District Council hotute an tel bawk a ni.