Mizoram chhim lama thang mek, Chief Minister Pu Lal Thanhawla chuan nimin khan Saiha District chhunga Niawhtlang, Lungbun leh Chhuarlung khua te a tlawh a, Mizoram Chief Minister ina heng khuate tlawh hmasa ber tu leh a awmchhun a ni.

Chief Minister chuan Niawhtlangah hian Backward Region Grant Fund leh Border Area Development Prograsmme atanga sum Rs. 84 lakhs hmanga motor kawng siam thar, Niawhtlang leh Hmaihrem Zawl inkalpawhna, 14 Kms a thui chu a hawng a. Tuipui lui kama awm, Hmaihrem Zawlah hian kawng hawn lawmna inkhawm buatsaih a ni a, hetah hian Tuipui kam lehlam Myanmar rama Belhar khua a Mizo, Lai hnam chengte chu tel vein, zai leh lamte an entir a. Chief Minister chuan Kumpinu sorkarin ‘Thendarh la, awpbet rawh’ tih khan Mizote hi a tuar nasa ber tu kan ni a ti a. Hemi avang hian Zofate chu India state hrang hrangah mai nilo, Bangladesh ah te, Myanmar ah te min thendarh a, tunah hian insuihkhawm duhna rilru kan nei reng a ni a ti a. Chu insuihkhawmna ni chu thlirin Pa Hun tiamah chuan kan la insuihkhawm ngei ang a ti. Chief Minister chuan khawi hmunah pawh awm ila, a khua leh tui tha, mi rinawm kan nih angai a, kan awmna apiang hi Pathianin a rawngbawl tura min dahna a ni tih hria a, kan hna theuhah rinawm tak leh tui taka kan thawh hi kan tih tur a ni a ti.

Belhar khaw mi ten Chief Minister Pu Lal Thanhawla hnena Tuipui kam atanga an khua thleng, 4 Kms vela thui, motor kawng siam sak tura an ngenna chu Chief Minister chuan siam sak a tiam a. Myanmar sorkar Palai nen thil tul tih fel hmasak ngaite tih hmasak anih tur thu sawiin, India leh Myanmar inkara inlaichinna tha a awm thu leh hmun hrang hranga insumdawn tawnna tura hmalak reng a nih thu a sawi bawk a ni. Myanmar Mizote hian Chief Minister te nupa hi thilpek an hlan bawk a ni.

Chief Minister hian Lungbun khua a tlawh hnuah Chhuarlungah khelmual hawngin vantlang inkhawm Community Hall-ah neih a ni a. Inkhawm hi bialtu MADC Executive Member Pu M.H. Tiabi in a kaihruai a. Chief Minister chuan Mara ten hnam hnufual an inti thin chu hnufualah a phal loh thu a sawi a. Ram leilung fa te vek kan ni a, kan chanvo leh mawhphurhna a inchen vek a, tumah inla hrang bik tur kan awmlo a, kan intluktlang vek a ni a ti. Hmasawnna ah erawh kan tan tlan angai hle a ni a ti. Chief Minister chuan Chhuarlung mipuite chu sorkar tawiawm reng tura chahin, NLUP an dawn te pawh hlawhtlinpui ngei tura rinawmna, taimakna leh Pathian tih chunga kalpui turin a chah a ni.Chief Minister te nupa hi Chhuarlung khaw mipui te chuan Saiha district chhunga Sial pachal lian ber nia hriat an present bawk a ni.

Chief Minister hi a nupui Pi Lal Riliani bakah Tourism Minister Pu S. Hiato, Parliamentary Secretary Pu H. Zothangliana, Saiha Bawrhsap Pu Alok Swarup, IAS leh MADC hotu ten an tawiawm a ni.