Vawiin chhun dar 1:00 khan Transport Minister Pu P.C. Zoram Sangliana chuan Mizorama Force Motors Ltd. Authorised Dealer City Force showroom Ramhlun Venglai ami chu a hawng. Hawnna inkhawmah thusawiin Minister chuan Force Motors te chu Mizoram atana hman tura duhthusam leh tha a nih thu a sawi.

Minister chuan Kolkata atanga he company hi a hmelhriat tawh thu leh Company mi leh sa te nen pawh a motor chanchin zirchiang tura an inkawm tawh thu te a sawi a, Force Motor bus Traveller te chu Mizoram kawng chep leh traffic jam avanga harsatna tam tak thlen thin bus lian tak tak te aiawh tura a that a rin thu a sawi bawk. Maxi Cab atana duan bik Cruiser te chu passenger phur hnem thei a nih bakah chuan nuam tak a ni a. Tlangram kawng nena inmil tura duan bik, khan sang bawk si chu intihhmuh chi nia a hriat thu a sawi a, sumdawnna reng reng hi Isua nena kalpui chuan hlawhtlinna a awm thin a, City Force te pawh hian Isua nena an sumdawnna an kalpui chu fakawm a tih thu leh kan ram tan pawha hmasawnna rahbi thar rawn pawchhuak ngei tura a duhsak thu a sawi bawk.

Force product hrang hrang te hi sumdawnna atana hman tura duan tha a tih thu leh mi tam tak tana eizawnna tha tak a siam chhoh theih tur thu a sawi a, tha taka he dealership kalpui tur leh customer te ngaihven kawnga theihtawp chhuah turin a fuih bawk a ni.

City Force Proprietor leh CEO ni bawk Pu Rochanmawia pawhin he dealership hi a tobul ropui lo hle mahse mi zawng zawng ban phak leh customer te tan hamthatna hrang hrang siamsak an tum thu te a sawi a. Mizorama an sumdawnna kawnga hma thar leh rahbi thar tuk tu nih tuma hmachhawp leh hmalakna hrang hrang te a sawi a, dealership enkawlna kawnga rawt duh nei te tan engtiklai pawha an inhawn reng thu a sawi bawk a ni.

Company aiawhin Dealer Accounts Manager Madhurjya Protim Borah pawhin thusawiin Mizoram atana City Force tena dealership an la chu a la tur awm berin an la a ni tih sawiin, thawhpui nuam tak an nih thu leh hun kal zel tur atana thawhhona tha tak a awm zel theih a beisei thu a sawi bawk.