Vawiin khan Chief Minister Pu Lal Thanhawla chuan Mizoram State Law Commission-in nikhat awh Mizo inneih, inthen leh rokhawm/roluah dan a duan chungchunga inrawnkhawmna hun a buatsaih Consultation on The Mizo Marriage, Divorce and Inheritance of Property Bill, 2013 chu I & PR Conference Hall-ah khuallian niin a hmanpui. He hun hi Law & Judicial Department changtu Minister Pu Lalsawta pawhin hmanpuiin he inrawnkhawmna hun hi Pu R. Lalrinawma, MLA leh Chairman, Mizoram State Law Commission chuan a kaihruai a ni.

Pu Lal Thanhawla chuan Law Commission changtlung tak kan neih in tunlai khawsak dan leh khawvel kalphungte ngaihtuah a, ram leh hnam tana kan hnam dan ennawn ngai nia hria a, ngaihtuahna zau tak hmanga he dan a rawn duan chhuah chu lawmawm a tih thu a sawi. He thil hi thil uluk ngai tak a ni a, tihsual palh a hlauhthawn awm a, chuvangin ngaituahna sen ngai tak anih avangin uluk lehzuala thlirho leh sawiho a tul a ni a ti. He dan hian Mizo nunphungah nghawng thui tak a neih dawn avangin he hunah tel pawl hrang hrang aiawhte, khawtlang mi pawimawhte leh dan leh hrai hria te chu inthlahrung lovin siamthat ngai laite an hriat chu sawichhuak turin a sawm bawk.

Chief Minister chuan he dan chungchangah kalkhawmte an lungrual theih a, tha an tih chuan Cabinet emaw Council of Ministers emaw thukhawm chuan Ordinance hmangin hman nghal theih tura chhawpchhuah theih a ni a, amaherawh chu Assembly thutkhawmna hmasa berah he dan hi pharh a, passed a ngaih thu a sawi tel bawk.

Pu Lalsawta chuan Mizo inneih, inthen leh rokhawm dan chungchang hi kum tam tak kan buaipui tawh a ni tiin he hun hi hemi chungchangah a hmawrbawkna nia a ngaih thu a sawi. Law Commission-in he dan an rawn rawt chhuak chu lawmawm tiin hemi chungchanga pawl hrang hrang ten ngaihtuahna an hmanna ah leh an puibawm naah lawmthu a hrillh bawk.

Pu R. Lalrinawmna chuan Law Commission hnathawh, hmalakna leh rawtna hrang hrang an thlen te chu sawiin he thil hi ram leh hnam tan thil pawimawh tak a ni a ti bawk. Pu R. C. Thanga, Member, Mizoram State Law Comission chuan he Dan hi chhawpchhuakin a bung hrang hrang te chipchiar takin a sawi. Chawhnu lamah he Dan sawizauna leh inrawnkhawmna hun neih zui nghal niin he hun hi Pu Zahmingthanga Ralte, Member Secretary, Law Commission chuan a kaihruai a ni. Pi Marli Vankung, Member Law Commission chuan inrawnkhawmna hi a khaikhawm in hun a hmang a ni.

Vawiin programme-ah hian tlawmngai pawl hrang hrang – CYMA, MUP, MHIP leh MJA aiawhte te bakah Mizoram State Women Commission, Social Welfare Board INTACH (Mizoram Chapter) leh Mizo Bar Association hruaitute pawh an tel. Khawtlanga mi langsar thahnem tak, dan leh hrai hremi leh Mizoram Law College-a zirtirtute leh zirlai te an tel bawk a ni.