Mizo Zirlai Pawl (MZP) General Hqrs. Office building thar, MZP Pisa Pui, Treasury Square a Education Department office bula mi, cheng nuai zasawmkua leh singkhat (Rs.190.1 lakhs) senga sak chu vawiin khan Chief Minister Pu Lal Thanhawla chuan a hawng.

Hawnna inkhawm car park-na tur hmuna neihah Chief Minister chuan mahni puala MZP in office tha tak an nei chu an tan rahbi pawimawh tak a ni a ti a. Zirlai ni chung si a hetiang hmun leh office tha tak an sualchhuak chu a ropui hle a ni a ti.

Chief Minister chuan Mizoram hi Zohnahthlakte tan chuan kan inpui, kan Jerusalem a ni a, a neitu ram leilung fate hi kan tling emaw tlinglo emaw nu leh pa ah min en a ni a ti. MZP ten zirlaite hamthatna tura ke an pennaah Chief Minister anihna ang pawhin a thlawp a ni Pu Hawla chuan a ti a. Lok Ayukta an vei hi a lawmawm a, la sawiho zel tur a ni a ti a. An pawl din chhoh dan atang leh mahni puala office tur an sualchhuahna atangte hian pisa tha tak nei tlak reng an ni tih a lang a ni a ti.

Mizo thalai zirlaite chu hman tlak leh chhawr tlaka chherchhuah sorkarin a tum tlat a ni tiin, hemi kalpui tur hian Education Reforms Commission dinin world class quality education pek kan tum a ni Chief Minister chuan a ti a. Thalai ten talent cho chhuah tham an nei tih sorkarin hriain kawng hrang hrang, zirna in sang zawk din thu ah te, infiamna lamahte leh Information Technology leh foreign scholarship siam lamah te nasa taka hma lak anih thu a sawi bawk a ni.

MZP President pawhin thusawiin an puala ram leh office nei tura an hmalaknaah Chief Minister Pu Lal Thanhawla chu a sulsutu pawimawh tak anih thu a tarlang a. An pisa thar chu Zohnahthlak zirlai zawng zawngte tana an inpui, an chawlh hahdamna tur a ni a ti.

MZP Pisa Pui hmun (ram) hi January ni 7, 2004 khan sorkarin a pe a, kum 25 chhung an hmang hawh thei (Lease) dawn a ni. A building sakna tur hian DoNER Ministry ah Post Matric Students’ Boys Hostel hminga DPR thehlutin, a sakna senso tur Rs.190.1 lakhs DoNER chuan a rawn sanction a. A sak hna hi 2nd April 2011 tanin 2nd Octobeer 2012 khan sak zawh a ni. Mizopa chhiarin chhawng sarih a sang a ni a, Office bakah Hall, canteen, hahchawlhna room, parking leh basement te a awm a ni. Kumin 2013 August ni 13 khan MZP hruaitute hian an luah tan a ni.

Inkhawm hi MZP Vice President Pu Lalsangzuala Ngente in a kaihhruai a ni.