Vawiin khan Home Minister, Pu R.Lalzirliana chuan Thenzawla Tribal Girls Hostel sakna tur lungphum a phum a, Govt. Thenzawl H/S RMSA hnuaia sak thar a hawng nghal bawk. Pu K.S. Thanga, Parliamentary Secretary chu khualzahawm a ni.

Hawnna inkhawmah hian Pu R.Lalzirliana chuan he Tribal Girls Hostel hi mithiamten sak dan tur an ruahman ang ngei a sak a nih theih a beisei thu a sawi a, khawtlang hruaitute leh mipuite chu in ti neitu taka hnathawktute tawiawm turin a chah a. Zirlaite leh Zirtirtute chu hmunhma tha neih ringawt duh tawk lo a rah chhuah tha tak nei tura tang turin a fuih a. Mi thluak tha hman tangkaina chang hria sorkar kan nei chu lawmawm a tih thu sawiin, NECS hmalakna te fakin, thahnemngai taka an thawhna chu lawmawm a tih thu a sawi bawk. Hna tan a nih vat theih nana lungphum chu phum an nih thu a sawi a. Bialtu MLA tha tak, Chief Minister, bial chhung mipuiten an nei chu vannei a tih thu a sawi. Dan kenkawhna kawngah mahni kuta thuneihna la mai lo a, a kengkawhtute puibawm thin zawk turin a chah bawk.

He huna khualzahawm Pu K.S. Thanga chuan Thenzawl chu khaw thangduang tak a ni tih sawiin, zin mite hipna turin hmalakna neih mek a nih thu sawiin, hmun pawimawh tak a ni chho zel dawn a ni, a ti. Khaw mipuite chu heng hmasawnna dawngsawng thei turin tang sauh sauh turin a chah bawk. Puan tah ah a bikin ram dang mi mamawh lo tura tang zual deuh deuh turin a chah bawk.

Kum 2012 a NECS leh Mizoram University & Social Welfare Department MoU ziak bawhzui azarah sum hmuh tan a ni a. Sorkar laipuiin sum 100% a tum a ni. Mizoram tan Tribal Girls Hostel pasarih (7) sakna tur Rs.2,660.59 lakhs sorkar laipuiin a sanction tawh a, chuta tang chuan Rs 1,873.00 lakhs Mizoram sorkarah a release tawh a ni. Mizoram sorkar leh NECS MoU a sign angin heng project te hi Design & Build System a sak vek tur a ni. He Tribal Girls Hostel, Thenzawla sak tur hi a building pumpui lenzawng chu 1074.44sq.m a ni a, Rs 359.83 lakhs a sak zawh tur a ni. A building sak hna hi lungphum zawh hian sak tan tum a ni a, thla 18 chhunga zawh hman tur a ruahman a ni.

He lungphum inkhawm hi Pu Lalsangliana Addl.DC, Serchhip in kaihruaiin, Major K.Biakthuama chuan hunserh hmangin Pathian hnenah a hlan a. Pu Robert Romawia Royte, NECS hnen atang sak dan tur leh sum hmuhdan report ngaihthlak a ni. Pu R.Lazirliana hi Education Department, Jt. Director Pu K.Lalrintluanga, Social Welfare Department Asst. Director leh Officials dang ten an tawiawm a ni.