No.665/2020-2021

Chief Minister Pu Zoramthanga chuan vawiin khan Lengpui Airport tihchangtlun hna thawh mek chu a hmunah a enfiah. Chief Minister hnenah hian Airports Authority of India (AAI) ten COVID-19 do nan CM Relief Fund atan cheng nuai 10 an hlan nghal a ni.

Chief Minister chuan Covid-19 hrileng avanga ram chhunga thlawhna tihtawp a nih chu remchangah la in, hun khirhkhan tak mai kan tawn mek hi a zawh hunah Mizoram in mi ramte ruala hmasawnna ke a pen ve theih ngei nan kan ram tana pawimawh em em mai Lengpui Airport a hna thawh mek chu chhunzawm a nih thu a sawi a ni.

Tunah hian Lengpuiah runway resurfacing hna thawh chhunzawm mek a nih bakah runway chhe lai dang awm zawng zawng siam hna te, thlawhna leh terminal building inkara bus tlanna tur siam bakah runway bula luikawr laih hna te thawh a ni a. Chief Minister chuan heng hmalakna bakah hian Lengpui Airport chawmtu tuikhuah en nghal in, tihlen theih dan awm te an thlithlai a. Airport Terminal chhunga thutna dah belh te, security holding a social distancing kalpui dan tur ruahmanna an siam te leh terminal pawn a restaurant leh park siamna tur te a en tel bawk a ni. Chief Minister hi Principal Consultant, Civil Aviation Pu J. Lalhmingliana, Wing Commander (Rtd) chuan a tawiawm a ni.

Vawiin hian Chief Minister hnenah hian AAI thawktuten Covid-19 hripui leng avanga puih ngaite puihna turin cheng nuai 10 CM Relief Fund a chhunluh tur an lo hlan a ni.