Lengpui Airport a IndiGo thlawhna service thar lawmna hun tukin zing khan Chief Minister Pu Zoramthanga hovin hman a ni. Regional Connectivity Scheme (UDAN-RCS) hnuaia IndiGo in India hmarchhak state zinga service an neihna khawpui parukna Aizawl chu niin, IndiGo flight hi Aizawl - Guwahati inkar service tur niin Agartala pawh a thlawk tel dawn a ni.

IndiGo flight service lawmna inkhawmah Chief Minister chuan Lengpui airport in airline service thar a nei belh chu lawmawm a tih thu sawiin, Mizoramin a chhawr tangkai hle tur thu a sawi a. Guwahati nen a inkalpawhna service a awm belh mai bakah Lengpui atanga thlawhna route la awm ngailo, Agartala khawpui pawh IndiGo service hian a telh chu lawmawm a ti a. Lengpui Airport chu changtlung zawka siam turin hmalakna a kal mek zel thu Chief Minister chuan sawiin, Lengpui atangin India ram khawpui direct flight a la awm a beisei thu a sawi bawk.

IndiGo Airlines Vice President Pu Vijay Matta chuan Aizawl thleng theia an hmalakna an zauh ta chu lawmawm a tih thu a sawi a. Lengpui Airport chu RCS hmalakna hnuaia India hmarchhak state zinga state parukna an service na tur niin, Aizawl chu IndiGo thlawhna domestic destination 62 na leh a pumpui chuan destination 85 na a nih thu a sawi a. Kolkata leh Delhi flight te pawh a remchan dan anga la siam zel an beisei thu a sawi.

Lengpui Airport a IndiGo flight service thar lawmna inkhawm hi Adviser to Chief Minister Pu C. Lalramzauva chuan kaihruaiin Mizoramin thlawhna service tam zawk a mamawh thu sawrkar laipuia a lo thlen tawh thin ngaipawimawh a hetianh ruahmanna siam a puitlin a ni chu lawmawm tiin flight awm belh chuan thui tak mipui mamawhna a phuhruk ngei tur thu a sawi a. Inkhawm hi Additional Chief Secretary Pu J.C. Ramthanga chuan lawmthu sawiin hun a khar a ni.

He hunah hian MLA Dr. K. Pachhunga leh Er. H. Lalzirliana te an tel bawk a. Civil Aviation Principal Consultant Wing Commander Pu J. Lalhmingliana, Airport Authority of India (AAI) Regional Executive Director Pu Sanjeev Jindal leh Mizoram sawrkara hotu pawimawh dangte an tel a ni.

IndiGo hi airline chuan man tlawm, InterGlobe Aviation Ltd company peng pakhat a ni a. Haryana ah Headquarter neiin thlawhna 255 service an nei a. Nitin flight 1500 chuang an nei a. Aizawl - Agartala - Guwahati flight hi ATR thawhna a ni.