Chief Minister Pu Zoramthanga chuan vawiin khan Lengpui Community Hall ah SEDP hnuaia Model Bamboo Plantation beneficiary mi 215 te hnenah tanpuina a sem. Heng beneficiary te hi Bamboo Development Scheme hnuaia hmalakna hmasa ber, Hmuntha leh Lengpui chhehvela model bamboo plantation siam tura thlante an ni.

Chief Minister chuan Bamboo Development Scheme chu state flagship programme SEDP beihpui thlakna tura duan a nih thu sawiin, vawiina beneficiary thlanchhuahte hnena an hna thawhna puihna tur sem chu ram economy siamthatna tura bultanna pawimawh tak a nih thu sawiin, he hmalakna hi state level a raw phunna beihpui lian ber a nih thu a sawi a. Chief Minister chuan beneficiary kalkhawmte chu thahnemngai taka thawk tura fuihin, an hmalak dan ang zelin puihna pek an nih dawn avangin an hlawhtlin leh hlawkna chu anmahni a innghat a nih tur thu a sawi a. Hlawk an duh chuan mithiamten hmalak dan tur an hrilh te chu ngaipawimawh turin a hrilh a. Chief Minister chuan society din pawimawh thu sawi bawkin, hotu tur inthlangin VC te nen tangkawp a, chungmite kaltlang chuan sawrkarin hma a lak tur thu a sawi bawk.

Bamboo Development Board Vice-Chairman Dr. K. Pachhunga, MLA chuan Mizoram economy a lo hmasawn theihna tura SEDP hmalakna pui ber Bamboo development hnuaia vawiina beneficiary te puihna sem hmasakna ber chu thil chhinchhiahthlak tak a nih thu a sawi a. Beneficiary te hnenah chuan duhsakna an dawn chu an taimakna nen an lawmthu an lantir ngei a beisei thu sawiin hun lo kal zel turah an hmalaknaah theihtawp an chhuah a rin ngei thu a sawi bawk.

Mamit bialtu MLA Er. H. Lalzirliana pawhin thu sawiin Mizoram sawrkar flagship programme hnuaia pilot project atana Hmunpui leh Lengpui thlan a ni chu lawmawm a tih thu a sawi a. Mau atanga thiamthil siamchhuah lamah pawh mi thiam tak tak an tam thu sawiin, hlawhtlin ngei tumna rilru pu chunga ruahmanna sawrkarin a siam chu beneficiary te in a taka thlentir turin theihtawp chhuah turin a chah a ni. 

Model Bamboo Plantation atan hian Hmunpui ah beneficiary 100 leh Lengpui atangin mi 126, an vaiin beneficiary 226 thlan an ni a. Vawiin hian an zinga mi 215 hnenah sumfaia puihna sem a ni a, a dang mi 11 erawh lo a la vah loh avangin la pek rihloh a ni. Vawiina tanpuina pek hi beneficiary pakhat tan Rs. 12,500 (a khur laihna atan Rs. 10,000 leh mangkhawh na tur atan Rs. 2,500) pek a ni a. An hmalak dan azirin a bak chu inpek leh zel tur niin mau chinna kara hmarchate chin tur pawh pek belh leh zel tur a ni. Model Bamboo Plantation ah hian raw chi khat brandisii chu chin tur a ni.

Horticulture Department in Model Bamboo Plantation atana cash assistance semna inkhawm a buatsaih hi Addl Chief Secretary Pu J.C. Ramthanga chuan a kaihruai a. Horticulture Department Director Pi Elizabeth Saipari chuan keynote address pe in, Lengpui VCP Pu Lawmthanga hnen atangin thusawi ngaihthlak ni bawkin Horticulture Department Joint Director Pu H. Manthianga chuan lawmthu sawiin hun a khar a ni.