DIRECTORATE OF INFORMATION & PUBLIC RELATIONS, Government of Mizoram, India

No.1494/2020-2021

Vawiin khan Chief Minister Pu Zoramthanga chuan Lengte Piggery Village a vawk vulhna farm hrang hrang a hmalakna te a hmunah a enpui. AH & Veterinary Minister Dr. K. Beichhua, Veterinary and Fishery Board Vice Chairman Pu C.Lalmuanpuia leh Mamit bialtu MLA Er. H. Lalzirliana ten an tawiawm a ni.

Chief Minister Pu Zoramthanga chuan AH& Veterinary Department officer-te leh he Piggery Village-a Lengte leh Nghalchawm vawk vulhtute chu thutkhawmna neihpuiin, Mizoram chu hmasawn tur chuan infrastructure lam bakah ei tur chaw, thlai leh sa a kan intodelh hmasak a pawimawh thu a sawi a. Covid-19 hian mahni a kan intodelh a tul zia a takin min zirtir a ni, tiin Chief Minister chuan AH & Veterinary Department hnuaia hmalakna chuan mipuiin sa thianghlim an mamawh (demand) zat phuhruk mai bakah ran ei tur a intodelh, state pawn atanga lak belh ngai lovin a note pawh intodelh zelna tur a nih chhoh ngei a beisei thu a sawi a. Piggery village chu midangte tana entawn tur a insiam chho tura a beisei thu sawiin, farm neitute chu theihtawp chhuah turin a chah a. An ranvulh chawmna tur tui mamawh chu ruahtui khawl tura ruahmanna tha tak siam ni se a ti bawk.

Chief Minister chuan COVID-19 avanga sawrkar hmalakna kal mek thenkhat chawlh lai lawk rih ngai te awmin, kalphung thlak ngai te a awm thu a sawi a. Chuti chung chuan sum neih sa chu a hlawk thei ang bera hmangin, ram a intodelh theihna turin thahnemngai taka thawh zui zel a tul thu a sawi a. Chaw, sa leh thlai ah chuan kan ram leilung leh sik leh sa awm dan leh tui dawn thin zat ngaihtuah chuan intodelh ngei ngei thei kan nih thu a sawi.

COVID-19 avang hian SEDP hnuaia ranvulh tihhmasawnna tura ruahmanna lo siam tawh chu siam danglamin, category thumah then in, beneficiary tlem zawkin hmalakna lian tham zawka kalpui tum a ni a, a thahnemngai tak tak te hnenah puihna pe tura ruahman a ni.

Piggery Village hi mimalin Vawk tlemte te darh sarh taka mahni mamawh a phuhru thei tawk chauh a vawk vulh chu a hlawkloh avangin, ram pum intodelhna atan leh mimal eizawn na tak tak a hman theih turin vawk vulhna hmun bik (Cluster) siamin, vawkvulh tak tak tur te tanpuina tur scheme IPEED project (Invention towards Pig productivity Enhancement through Entrepreneurship Development) siam a ni a. Kum 2018-19 atang khan Rs.391 lakhs total project cost a hmalak tan a ni a. He project cost ah hian Beneficiary/entrepreneur thlanchhuahte hian 25% tum in state sawrkar in 75% a tumsak a ni.

Lengte-Nghalchawm cluster ah hian beneficiary panga thlan niin heng farm-ah hian belhkhawmin vawk 850 chuang a awm mek a ni.

He cluster approach a vawk sa thianghlim a state a intodelh theihna tura hmalakna hi mimal vawk vulhtuten hlawk zawka an vulh theih nan leh entrepreneurship tihhmasawnna a ni pah fawm a. IPEED hnuaiah hian vawk vulhte chu natna hrileng hrang hrang leng thei laka an himna turin Bio-security measure hrang hrang nen a farm te hi thuam a ni a. Nghalchawm leh Lengte hi vawk hrileng la awm ngai lohna, khaw dang kawngin a tan tlang loh avanga him tak leh khaw panna kawng tha tak si a nih avanga thlan a ni a.

Vawk vulhtute chuan sawrkar hmalakna chungah lawmthu sawiin, intodelhna tura an hmalakna leh Department mithiamte kaihhruainaa farm changtlung leh natna laka him tak an siam thei chu lawmawm an tih thu an sawi a. A panna kawng leh power supply lamah harsatna an tawh thu an sawi bawk.

Vawiin hian Chief Minister hi Additional Chief Secretary Pu J.C. Ramthanga leh AH & Vety Department hotuten an tawiawm a ni.

Attachment