No.1495/2020-2021
Vawiin khan SAD Conference Hall, MINECO ah Health Minister hovin COVID-19 dona kawnga inrawnkhawmna buatsain a ni a, Home Minister Pu Lalchamliana, Medical Oprational Team Chairman Dr. ZR Thiamsanga, Chief Secretary Pu Lalnunmawia Chuaungo leh Sawrkar hotu lian thahnemtak telin Indian Medical Association (IMA), Mizoram Government Doctors’ Association (MGDA) leh Non-Governmental Hospital Association of Mizoram (NGHAM) aiawhte an tel a ni.
Inkawmhona hun sawi hawngtu Health Minister Dr. R. Lalthangliana chuan COVID-19 do kawnga Chief Minister Pu Zoramthanga kaihhruaina hnuaia Mizoram sawrkar inpuahchah dan chu chhuanawm leh lawmawm tak a ni, a ti a. Hetih rual erawh hian kan inthlahdah hauh loh a tul a, he hrileng hian eng chen nge min cham chilh dawn a hriatloh a, a lo berah July thla tawp thleng hi chuan kan la buai dawn niin a lang a, sawrkar hnathawkte, tlawmngai pawlte, mipuite kan hah tlang em em tawh chungin thuneitute tan pawh rorel thiam a har em em a, vawiin anga kan thurel tha tak ni a kan hriatte pawh a tuk lawkah a lo tangkailo leh mai thin a, a harsa takzet a ni tiin hah taka thi leh thau pawlh a ngaihtuahna sengtute pawh an zahawm em em a ni a ti a. Minister te leh MLA engemawzat ramchhung hmun kilkhawr ber ber fanga an fehchhuak mekte hian thla an timuang a ni, a ti.
Vawiin inkawmhona ah hian IMA, MGDA leh NGHAM aiawha tel te chuan khawvel pumpui bakah India ram leh thenawm state pathum- Assam, Tripura leh Manipur ah te COVID-19 a darh zel dan thlir chung leh Mizoram mi leh sa singkhat chuang zet rawn haw mek leh rawn la haw tur an la awm avangin lockdown hi kalpui chhunzawm zel tha an tih thu an sawi a, Rapid Antibody Test chu tangkai viau mahse RT-PCR khawl hmanga test tam zawk tih a nih theih nan hma lak tula an hriat thu leh COVID-19 testing laboratory ZMC ah chauh a awm avangin hmun kilkhawr leh hla zawka sample test tura lak te rang tak tak a hriat a nih theih nan RT-PCR khawl lei belh a a tul dan azira District Hospital ah te dah tura ruahmanna siam tula an hriat thu te an sawi a ni.
Sawrkar hotute chuan ZMC hi COVID-19 designated hospital a puan a ni nachungin Sawrkar laipui ruahman dan zawmin Covid Care Centre, Dedicated Covid Health Centre Mizoram hmun hrang hrangah siam a ni a, COVID-19 natna vei an awm pawhin an serious dan azirin heng hmunah te hian a inenkawl theih tih an sawi a, Sawrkar Laipui atanga an dawn RT-PCR tluka rin tlak Molbio Truenat khawl pahnih chu Lungleiah hman theih turin bun fel tawh a nih thu leh khawl dang pahnih pawh hman tangkai dan tur ngaihtuah mek a ni, an ti.
Private hospital ten damlo admit duhloh an nei thin ni a sawi awm chungchang zawhna chhangin NGHAM aiawhte chuan damlo admit duhloh, lo hnar tawp an neih sawi tur an hriatloh thu an sawi a, phai lam atanga damlo rawn hawte erawh ZMC ah RT-PCR hmanga an negative a ni tih finfiah phawt tula an hriat avangin ZMC lama sample testing ti phawt tura an ngen thin thu an sawi a ni.
RT-PCR neih belh mamawhna a nasatzia sawiho a ni a, RT-PCR hi COVID-19 vei an awm leh awmloh hriat awlsamna ber a nih avangin tangkhang lo haw te swab sample he khawl hmang hian test vek duhthusam a ni an ti a, hemi chungchanga harsatna awm theite sawiho a nih hnu ah DM&R Minister Pu Lalchamliana chuan sawrkar laipuiin SDRF ah Rs 23.5 crore Mizoram a rawn pek thu leh hemi atanga 35% chu COVID-19 do nan hman a phal a, 10% hi hemi kawnga bungraw mamawh lei nan hman aphal avangin RT-PCR leina tur chu concerned department lamin proposal an siam chuan hemi atan hian a hman theih ang, a ti.
Vawiin sawihona ah hian Ambulance mamawhna a nasat thu pawh sawilan niin sawrkar hotuten a tul angin an bawhzui dawn a ni. Quarantine Facility hrang hrangte hman dan pawh uluk zawka ngaihtuahna sen tula an hriat thu sawilan niin tunah hian Mizoram pumpuia mi 16,576 lenna tur quarantine facility hrang hrang chhinchhiah a ni tawh a, amaherawhchu hmun pakhatah mi quarantine mek an awmin an quarantine hun a zawh hma chu midang dahbelh a rem thin lova, hei hian harsatna a thlen thei dawn a ni, an ti a, quarantine facility-te awmze nei zawka hman dan ruahman a tul tih an sawi a ni.
Daktawr rualte chuan COVID-19 laka invenna atan mask vuah, kut silfai leh social distancing zawm a pawimawh ber tih sawi langin mizote hian kut silfai leh social distancing hi kan la thiam tawklo ni a an hriat thu leh inzirtir uar lehzual tula an hriat thu an sawi a ni.
Health Minister Dr. R. Lalthangliana chuan COVID-19 do kawnga theihtawp chhuahtute zawng zawng chungah lawmthu sawiin COVID-19 hian kan nunphungah a tha lamin nghawng nei thei ngei se a duh thu a sawi a, mipuite chu chi-ai lo, fimkhur tak si a awm tura zirtir an pawimawh a ni, a ti a. Hetih kawnga thawktu hrang hrang zingah DDK, AIR, Cable TV network hrang hrang leh print media te thahnemngaihna leh tanlakna a chhuanawm tih sawiin an hnathawh that sawrkarin a hre reng a ni tih a sawi bawk a ni.
Attachment
- Loading attachment...
