Chief Minister Pu Lal Thanhawla chuan vawiin chawhnu khan Lungdai YMA Hall-ah Lungdai Health Security Scheme chu khuallian niin a hawng. He scheme hi Lungdai khua Gram Sabha, khawtlang hruaitu leh mipui kalkhawmin damloh nikhuaah khawtlang mipuite an harsatna an inchhawk zangkhai tlan theihna tura lungrual taka an duanchhuah a ni a. Health Security Scheme hawnna inkhawmah hian Pi Lal Riliani, President, Indian Society on Tobacco and Health chu khualzahawm niin, Health Minister Pu Lal Thanzara pawh a tel a. Bialtu MLA Pu Lalhmingdailova Khiangte chuan hun a kaihruai a ni. 

Chief Minister chuan khawtlang duanchhuah Lungdai Health Security Scheme chu Mizoramah a awm vawikhatna nia a hriat thu sawiin tha a ti hle a. Sawrkar hnathawk awm lohna chhungkua leh Health Insurance te nei ve lo tan chuan a manhla lehzual in a thlamuanthlak tur thu a sawi a, he Scheme-ah hian ngaihtuahna fing (innovative effort) a tel a, a entawntlak in a changkang hle a ni, a ti. Chief Minister chuan ram hmasawnna atan a chhunga cheng mipuite an hrisel a pawimawh thu sawiin, sawkar pawhin kawng hrang hranga hma a lak thu Chief Minister chuan a sawi a. Chutih rual chuan Mizoram chu hriselna kawngah hmasawnna tur tam tak a neih thu sawiin, Cancer leh HIV/AIDS hluarna state a ni mai te chu a pawiin, chumi piah lamah ei leh in leh nunphung in a zir loh avanga natna hrang hrang nei an awm tam zel bawk a. Mitin kan fimkhur a, nun kan uluk tlan a pawimawh a ni, a ti a. Hrisel tur chuan nun uluk bakah faina a pawimawh tel thu sawi bawkin, rilru leh taksa bakah silh leh fen, inchhung leh khawtual vawn fai hi kan zavai mawh a ni, a ti bawk. Chief Minister hian he scheme atan hian cheng nuai sawm a hlan bawk a ni. 

Khualzahawm Pi Lal Riliani chuan Lungdai Health Security Scheme duanchhuah a ni chuan khaw inlungrual tak an nih zia tilangtu leh khawtlang hruaitu mipuite hamthatna ngaihven tak an nei tih a rinawm a ni, a ti a. Zuk leh hmuam tilo chawimawina hmang thin  khua an nih avangin leh khaw fai ni tura hma an lo lak tawhna atang chuan hriselna an ngaihpawimawh a langchiang hle ni, a ti. Khualzahawm chuan Health Security Scheme chu khaw mipui sum thawh tlingkhawm hmanga kalpui tur a nih avangin an hotuten langtlang leh rinawm taka an kalpui a beisei thu a sawi bawk a. Sawrkar pawhin Health Security Scheme hrang hrang a kalpui ve mek bawk thu sawiin, chutih rual chuan heng hmalakna hrang hrangte hi hman tangkai ngailo thei khawp hrisel nih kan tum a ngai bawk a ni tiih, Lungdai khaw mipuite chu hriselna ngai pawimawh chhunzawm zel tura chahin, zuk leh hmuam laka fimkhur a, 'tobacco free village' a lo nih a beisei thu a sawi bawk. 

Health Minister Pu Lal Thanzara pawhin thu sawi bawkin, khawtlang mipuite that tlanna leh hmasawn tlen theihna tura ngaihtuahna thar hmang a Lungdai Security Scheme siam a ni chu an remhria in lawmawm a tih thu a sawi a. Sawrkarin mipui hrisel zawkna tura ruahmanna a siam hrang hrangte tarlangin, sawrkar a hnathawh nei velo, bill ve theilo te tan an damloh nikhua a an hman tur atan RSBY leh Healthcare Scheme te siam niin, hmang tangkai pawh an tam tawh thu a sawi a. Scheme pahnihah hian kumtin Rs. 27-29 crores pek chhuah a nih thin a ni. Mizoram a Doctor zirna tur College, Medical College (Mizoram Institute of Medical Education & Research) Falkawn pawh thla leh lawka hawn beisei a nih thu Health Minister hian sawiin, tunah Doctor zir tum seat 100 atan mi 60 chuang an in admit tawh a ni. 

Lungdai Health Security Scheme hi Lungdai khua mi damlo hospital-a inenkawl ngai te sum leh paia inchhawk zangkhaina atan Village Council leh Pawl hrang hranga an hruaitute kokim taka intelkhawmin Lungdai Health Security Society indin a an ruahman a ni a. He society hian sawrkarah pawh Society registration (Registration No.MSR 946 of 9.7.2018) lak fel a ni. Society hian inkawihhruaina te siamin Scheme fel takin duan a ni a; a nihphung tlangpui hetiang hi a ni: 

1) Lungdai khua mi leh sa Job Card, Ration Card leh Aadhaar te beh chhanin member inziah luh tur a ni a;

2) Member ten chhungkaw khat aiawha an sum chhun khawm tur chu Rs. 2050/- (one time) a ni;

3) Damlo hospital a luh ngai, hospital bill Rs. 60,000 pel te chu Rs. 25,000/- tanpuina pek tur a ni ang a, hospital bill Rs. 60,000 pel lo te erawh chu an senso atanga 30% tanpuina pek tur a ni. Case danglam bik a awmin Society management committee-in tha a tih angin a rel thin dawn bawk a ni;

4) Sum vawm khawm hi khawih chet tur Rs. 2,00,000 vel dah hran bak chu a pung awmin Bank ah dah tur a ni;

5) Sum chhunkhawm target hi Cheng nuai 20 a ni a, a tul anga hnatlang ilo hmanga hlawh chhuah tura ruahman a ni bawk. 

Vawiin Lungdai Health Security Society hawnna inkhawmah hian  Pu R.L. Rinawma, Principal Adviser to CM leh Kolasib District a sawrkar office hotu thenkhat an tel a ni.