Chhimlam khuate tlawha zin mek, Chief Minister Pu Lal Thanhawla chuan nizan khan Lawngtlai atangin Lunglei a thleng. Lunglei a panna-a Thingkah khuaah Bharat Nirman Rajiv Gandhi Sewa Kendra (BNRGSK) building, VC House tur, Backward Region Grand Fund atanga Rs. nuai 9 senga a sak chu a hawng nghal a ni.

Tukin zing khan Chief Minister hian Lunglei Circuit House a Conference Hall-ah Sorkar hnathawk hotute a kawm a. Chief minister chuan democracy ah chuan sorkarna a inthlak thin a, a hnathawkte erawhchu an inthlak ve ngailo a ni a ti a. Chuvangin sorkar hnathawkte chu a neitu dik tak an nih avangin sorkarah chauh rinawmna nghah tur a ti. Hetih laia ruling party a rinawm tumte hi mi chimawm, inlulingte an nih thin avangin a tha lova, an efficiency a tichhia a ni a ti. Chuvangin sorkar apiang ah rinawm taka thawk turin a chah a ni.

Chief Minister chuan an sorkar tirha hnathawh phungte, work ethics te, discipline leh punctuality awm miahlo te kha, kum 3 hmel an hmuh chhung hian a ziaawm tawh hle a ni a ti a. Hemi chhung vek hian eirukna lama hming hliau, Minister te leh Official lamah sawi tur a awmlo chu a lawmawm hle a ni a ti a. An sorkar chuan eirukna leh hlemhletna a duh loh avangin, Minister te chu hetiang laka fihlim hmasa tur an nih angin, a vengtu atan Ethics Committee din anih thu a sawi a. Eirukna in mipui chanai a tihchingpenzia sawiin, Sangau a Tourist Lodge sak chhe em em mai chu a sawichhuak a. Chuvangin sorkar hnathawkte chu a chhe lai siam thatu ni turin a sawma ni. Pu Hawla chuan sorkar hnathawkte chu Property Return ngai pawimawh turin a chah bawk a. Sorkar flagship programme NLUP chu a hlawhtlin ngei theih nana line departmenta mi ni ve lo te pawh tui pui turin a chah bawk a, an zingah corordination tha tak vawng turin a chah bawk a ni.

Chief Minister chuan sorkar sum dinhmun a that loh thu sawiin, an hlawhte chu sorkar phak bak atanga pek an nih thu a sawi a. Sorkara hamthatna dil a, nawrh emaw vau emaw te chu a hlauh loh thu a sawi bawk. Sorkar chu inrenchem taka kal a tul thu sawi bawkin, tunah rih chuan sorkar hnathawkte chungah an lawm thu a sawi bawk a ni.

Chief Minister hi Pu S.Laldingliana, Parliamentary Secretary, Pu R. Lalrinawma, Chairman, Law Commission leh Pu T.T.Zothansanga,MLA ten an tawiawm a ni. Lunglei DC Pu V.Sapchhunga’n inkawmna hun hi a kaihruai a ni.