Vawiin khan Chief Minister Pu Lal Thanhawla chuan Lunglei Electric Vengah Mizoram chhim lam NCC Cadet-te bialtu tur 2 Mizo Battalion chu hawn a ni a. Hemi rual hian Commerce and Industries Department hnuaia Agri-Marketing & Training Infrastructure sak tur lungphum phum a nih bakah Skill Development Training Centre hawn a ni bawk. He programme-ah hian Mizoram Youth Commission Pu Joseph Lalhimpuia, Lunglei East MLA ni bawk chu khualzahawm a ni a. Social Welfare Minister Pu PC Lalthanliana, Lunglei North bialtu MLA chu a tel bawk.

Khuallian Chief Minister Pu Lal Thanhawla chuan NCC Bn Mizorama din belh a ni chu India hmarchhak NCC enkawltute hmalakna rah a nih thu sawiin an chungah lawmthu a sawi a. NCC chu sipai a lut duhte tan inpuahchahna tha a nih vangin eizawnna zel atan a thil tangkai a nih thu a sawi a. Sipaia luh zui zel tum kherlo tan pawh mahni nun invawn (discipline) na kawnga leh khua leh tui tha nihna kawnga inzirtirna tha a nih tel thu a sawi bawk. Chief Minister chuan Mizorama NCC Battalion te thuam tha tura kawng hrang hranga hmalak a nih thu sawiin, Tuirial Airfield chu NCC Flight Training leh tul dang atana ruahman mek a nih thu te, Flight Simulator lei a nih tawh thu te leh reilote a Flight Training neih tan tum a nih thu te a sawi a. Air Wing chu India hmarchhak pumpui tan a nih tur thu a sawi bawk.

Chief Minister chuan Skill Development Training Centre chu tangkai taka hman a nih ngei a beisei thu sawiin, Agri-Marketing & Infrastructure pawh ruahman anga din chhoh ngei a duh thu a sawi a. Heng hmalaknate hi thahnemngaihna tak tak in zui se tiin, hman tangkai a nih loh chuan sum a luangral mai tihna a ni a ti. Kuthnathawktute tana sawrkarin kawng hrang hranga hma a lak sak dan sawi bawkin Chief Minister chuan remhriatna leh thahnemngaihna a kal kawp tul a tih thu a sawi a. Hlawk tak tak tur chuan tharchhuah tam a pawimawh thu te, tharchhuah sa sawngbawlna leh a tul anga buaipui zui zel dan tur chu sawrkarin a ngaihtuah zel thu te a sawi a. Inkalpawhna tha a pawimawh tel avanga central scheme bakah NEDP hnuaiah te link road siam a nih thu a sawi bawk. Chief Minister chuan hmasawnna atana sawrkarin building leh programme a buatsaih te chu mahni tan vek a ni tih hre chunga tangkai tak a hmang thin turin mipui a chah a ni.

Khualzahawm Pu Joseph Lalhimpuia chuan Lungleia thiamna leh themthiamna tipung tura hmun tha leh pawimawh tak tak hawn a ni chu lawmawm a tih thu a sawi a. Tangkai taka chhawr ngei a nih beisei thu sawiin, a neitu veng mipuite pawhin neitu rilru an put a beisei thu a sawi bawk.

Vawiin sawrkar hmalakna pawimawhte a ruala hawnna inkhawm hi Commerce and Industries Director Pu J. Hmingthanmawia chuan a kaihruai a. Pu Lalthlamuana, Lunglei Electric Veng Br. YMA President hnen atangin thusawi ngaihthlak a ni bawk. Pu Zothanmawia, Sports & Youth Services Director chuan 2 Mizo Battalion NCC Lunglei chungchang sawiin, Cadet 3520 awmna tura ruahman a nih thu a sawi a. District pali - Lunglei, Serchhip, Siaha leh Lawngtlai a zirna in college 5 leh High School 14-a NCC Cadet te a enkawl ang. Kum thum chhunga a tul leh mamawhte he NCC Battalion ah hian dah fel vek hman tum a ni. Sawrkar laipuia Ministry of Defence chuan officer 2, JCO 8 leh NCO 18 a dah tawh a, Mizoram sawrkarin civil staff a pe thung ang. 2 Mizo Bn. NCC din that hian an luah turin Printing & Stationeries building, Ramthar Veng, Lunglei ah enfiah a, building insem dan tur pawh ruahman fel tawh a ni.

Er. Samuel Lalrawngbawla, AE, Commerce & Industries Dept. chuan  Agri-Marketing & Training Infrastructure leh Skill Development Training Centre chungchang report a pe. Agri-Marketing Centre sakna tur hian cheng nuai 1082.93 ruahman a ni a, NABARD kaltlanga hmuh a ni. Building sak tur hi a dung 105 feet, a vang 78 feet, a san zawng 57 feet niin, chhawng 5 awm tura ruahman a ni a. Basement-I chu parking area, Basement-II chu Agri-Marketing atan, Ground Floor chu Multipurpose Hall leh office atan leh a chung floor pahnih chu MYC Coaching Centre leh Hall atan ruahman a ni.

Skill Development Training Centre hawn tak hi sakna tur a sum ruahman chu cheng nuai 243 a ni a, sawrkar laipuia ASIDE Scheme leh NEDP atanga hmuh a ni. Building hi a dung feet 55, a vang feet 55, a san zawng feet 45 a ni a. Floor pali awmin, Basement chu 2-wheeler leh LMV Parking a ruahman niin, Ground Floor chu Knitting & Tailoring tan a ruahman a ni a. First Floor chu Handloom atan dah niin Second Floor chu Rest House tura ruahman a ni.

Vawiin programme-ah hian Lunglei DC leh sawrkar office hotulu te bakah khawtlang leh tlawmngai pawl hruaitute an tel thahnem hle a ni. Programme hi Pu Laltanzuala, General Manager, DIC, Lunglei chuan lawmthu sawiin a khar a ni.

 

 

Attachment

  • Loading attachment...