No.7852/2020-2021

19.3.2021: Lungleia cham mek Chief Minister Pu Zoramthanga chuan vawiin tlai khan Zobawka Lunglei District Park, Zobawk ami leh Luangmuala Truck park-na hmun te chu tlawhin, tihchangtlun hna kal mek leh ruahmanna awm te a enpui.

Lunglei District Park hi Lunglei High Powered Committee-in tunah hian a chei that hna an thawk mek a. Luangmualah hian PWD kudam thin chu thiatin, truck chawlhhmun leh tul dang atan tangkai zawka hmang turin ruahmanna siam mek a ni. 

Chief Minister hi Agriculture Minister Pu C. Lalrinsanga, Sports and Youth Services Minister Pu Robert Romawia Royte, Lunglei HPC Vice Chairman Pu Lawmawma Tochhawng, Roads & Infrastructure Board Vice Chairman Er. H. Lalzirliana, Bamboo Development Board Vice Chairman Dr. K. Pachhunga ten tawiawmin, SYS leh Tourism department-a hotute leh district hotute an tel bawk a ni.