No.7851/2020-2021
Kolasib dated 19th March 2021: Vawiin chawhnu khan DC Conference Hall-ah Dr.H.Lalthlangliana, Deputy Commissioner hovin Kolasib district Consultative Committee/ District Level Review Committee/ District Level Security Committee-te chuan thutkhawmna an nei a. Pi Lorna T.Gangte, Convener, Lead District Manager chuan sawi ho tur thupui 11 sawi hawnna hun a hmang a, Kolasib district chhung a bank hrang hrangte kum 2020-21 chhung a an hmalaknate enho a ni.

Thutkhawmnaa a lan dan chuan Kolasib district-a bank hrang hrangte Credit Deposit ratio chu 55.56% anga chhut a ni a, Priority Sector tan a loan pekchhuah zat chu 68.76% niin Agricultural Segment hnuaia loan pekchhuah zat chu za zela 19 a ni.

December 2020 thleng khan KCC account 2597-ah cheng nuai 1339.1 pekchhuah a ni a, Rupay card 851 pekchhuah zingah 829 tihnun a ni. MSME-a account 897 hnenah cheng nuai 1838.06 semchhuah a ni a, pekchhuah tur bituk zat atangin Housing loan hi za zelah 66.96 pekchhuah a ni bawk.

PMEGP hnuaia account 114 hnena cheng 785.71 pekchhuah tuma hmalaknaah account 84-ah cheng nuai 221.97 pekchhuah a ni tawh a, PMMY hnuaia account 582 awmah cheng nuai 509.53 pek a ni tawh bawk a ni.
He thutkhawmnaah hian SHG linkage scheme chak zawka kalpui dan turte leh Social Security scheme hrang hrang awmze nei zawka kalpui dan tur sawi ho a ni a, a chhawrtutur ber mipuite hnena inhrilhhriatna tha kalpui dan turte rel a ni.

Cheng sawm thir hman chungchangah mipui zingah harsatna tawk an awm thin thu sawi niin DCC thutkhawmnaah chuan cheng sawm thir hmanna kawngah RBI atangin khapna emaw tihtawp tumna engmah a awm loh thu tarlan a ni bawk. MSME-a inziaklutte tan hripui leng avanga loan rulh chungchanga harsatna neite chuan District Industries Centre, Kolasibah Subvention Subsidy Scheme dil theih a ni thu sawi a ni.