No.7850/2020-2021

19.3.2021: Chief Minister Pu Zoramthanga chuan vawiin khan State Sports Academy, Zobawk, Lungleia Residential Sports School sakna tur lungphum a phum a; Agriculture Minister Pu C. Lalrinsanga, Sports & Youth Services Minister Pu Robert Romawia Royte leh Lunglei HPC Vice Chairman Pu Lawmawma Tochhawng te chu khualzahawm an ni bawk.

• Chief Minister Pu Zoramthanga chuan lehkha zirna bakah sports lama ngawrh taka inzirtirna hmun pui siam tura bultanna chu reilo teah tangkai taka chhawr a nih  ngei a beisei thu a sawi a. Zobawk khua, Lunglei leh Mizoramin a tangkai pui tur thu sawiin, sports discipline hrang hranga mi chhuanawm leh entawntlak tam zawk kan inchherchhuah zel theih a beisei a. Tun dinhmunah state pawn leh ram pawna lang pha thalai an awm chu lawmawm a ti a, a tam zawk pawh kan inchher chhauk zel anga, he Residential Sports School pawh hi state pawn atanga rawn chhimtu an awm pawhin inthianthatna nen rilru zau tak pu chungin kan awmho zel tur a ni, a ti a. Chief Minister chuan tunlai sports discipline hrang hrang kan chawisan rualin pipute infiamna, Indigenous games kan neih ang te pawh hi chawisan ve zel tha a tih thu a sawi bawk.

• Agriculture Minister Pu C. Lalrinsanga chuan Mizote hi infiamna lamah te, music a ni emaw, discipline hrang hrangah thiam hma, ti thei ve zel kan nih thu sawiin, heng kan talent te hi kan chawikan a, zirtirna tha kan inpek chuan a tawpah chuan ram economy tan thlenga hlawkna state-in a tel phah na tur a nih thu a sawi a. Tih tak takna rilru kan put hmasak a pawimawh a ti a ni.

• Sports and Youth Services Minister Pu Robert Romawia Royte chuan Lunglei district chu sports hub pawimawh tak a nih chhoh ngei tur thu a sawi a. Residential Sports Sikul din tur chu Central Sorkar duhdanin Mizoram mai bakah state dangte pawhin an chhawr ve theihnana rilru zau tak put a tul tur thu sawiin, classroom zawng zawng pawh smart classroom a IT Aided Teaching kalpui tum a nih thu a sawi a. Hnathawh reng rengah quality tha chauh an pawm tur thu sawiin, Football Field pawh FIFA certification kan phut ang a ti a. Kolasib a SAI Centre a football ground siam chu FIFA-in an test result chhuakin a qualified a, Mizoramin FIFA Certified Football Ground kan neih hmasakber a ni a ti. Sports Minister chuan Lunglei Music Centre changtlung tak din turin ruahmanna an neih thu a sawi bawk.

• Lunglei HPC Vice Chairman Pu Lawmawma Tochhawng chuan Lunglei district leh chhim lam district tana tangkai tak tur hmalakna thar a awm chu lawmawm tiin, thalaite tana sports lama hmasawnna nasa tak a thlen ngei a rin thu a sawi a. Kan thiltih theuhvah theihtawp kan chhuah ang a, kan hlawhtlinna atangin midang tan entawn tur kan siam a pawimawh a ni a ti.

• Vawiina Residential Sports School sakna tur lungphum phum tak hi Sports & Youth Services Department kaltlanga Pradhan Mantri Jan Vikas Karyakram (PMJVK) hnuaia sum hmuh hmanga thawh tur, a sakna tur hi cheng nuai  3430.98 approve tawh niin, 1st Installment cheng nuai 1543.94 dawn tawh a ni. Residential School-ah hian lehkha zirna pangngai pek bakah Sports discipline hrang academic building bakah mipa leh hmeichhe tan hostel mi 100 awm theihna ve ve (a vaiin zirlai mi 200), multipurpose hall, astro football turf, principal leh teachers/coaches quarters te, swimming pool leh diving pool te, basketball leh volleyball court te leh a tul dangte awm tura ruahman a ni.

• Vawiin lungphum puala inkhawmah hian Chief Minister hi Mamit bialtu MLA Er. H. Lalzirliana, Roads & Infrastructure Development Board Vice-Chairman ni bawk leh Dr. K. Pachhunga, Lunglei South bialtu MLA leh Bamboo Development Board Vice Chairman te an tel bawk a. Inkhawm hi SYS Commissioner & Secretary Pu H. Lalengmawia chuan kaihruaiin, Mizoram State Sports Council Secretary Pu John Tanpuia hnen atangin technical report ngaihthlak a ni. Lunglei DC Pu Kulothungana chuan lawmthu sawiin hun a khar a ni.