No.7849/2020-2021

Dated Aizawl, the 19th March, 2021: Vawiin khan Rural Development Minister Pu Lalruatkima chu All Mizoram DRDA Employees’ Association (AMDEA) General Conference Vawi 4 na-ah khuallian a ni a. Conference hi Pachhunga University College Seminar Hall-ah hman a ni.

Minister Pu Lalruatkima chuan AMDEA hi Mizoram sawrkar hnuaiah registration tiin tun dinhmunah member 110 an awm mek thu a sawi a, hun kal tawhah harsatna eng eng emaw te neiin, chinfel ngai te a awm thu leh post enge maw chen chu tihfel a ni tih te a sawi bawk a. COVID-19 hrileng karah hmabak tam tak a awm a, sawrkar chuan a hnathawk te a ngaipawimawh a, theih tawp a chhuah zel thu a sawi bawk a ni.

Information & Public Relations Minister a nihna angin he hunah hian mipuite hriattur pawimawh tak sawichhuah chu a tih mak mawh a ni tih sawiin, Chief Minister zahawm tak Pu Zoramthanga’n kan unau Myanmar lama awmte thlavang a hauh nasa hle a, hemi tih chian nan a tul angin Central sawrkarah pawh a thu mai ni lo, ziakin ngenna te pawh a then a ni a ti a. March ni 18, 2021 khan Prime Minister zahawmtak Pu Narendra Modi hnenah pawh DO letter thawnin Myanmar harsatna avanga kan unau kan Zohnahthlakpuite humhim an nih theihna atan leh Democracy vuak chhiat mek a nih avanga mangang-a India (Mizoram) rawn belte tan kawng hawng tur leh a tul anga hma lak a nih theihna turin ngenna a thlen a ni, tiin a sawi. Minister chuan Home Ministry, Govt. of India-in a thuchhuah (advisory) State hrang hrang Mynamar nena ramri intawm Chief Secretary te, Assam Rifles leh BSF te hnena a pek ramri rawn kan an awm pawha lo chhinchhiah a, thawn let tura a tih chungchang pawh Mizoram chuan kan pawm theih loh thu a sawi bawk a, a ti a. Hetiang ang issue lian tham mihringte zalenna rah behna hi keini Mizoram chuan kan palzam mai mai thei lo a ni tih thu a thlen bawk a ni, tiin a sawi a. Hemi chungchangah Pu Lalrosanga, MP Lok Sabha in External Affairs Minister March ni 16, 2021-ah leh Pu Vanlalvena, MP, Rajya Sabha pawhin India Vice President, March ni 15, 2021 a hmuh thu te, Rajya Sabha-ah pawh March ni 16, 2021-a MP-in Myanmar rama zohnathlakte harsatna tawh mek thu a thlen bawk a ni, a ti a. India ram khawvel huap pawha Democracy ram lian berin hetiang issue kan ram thenawma a thlen mek lai hian theih tawp chhuah a raltlante leh tanpui ngaite tanpuina kawnga hma a lak a phut takzet tih I&PR Minister hian a tarlang a ni.

He hun hi Pu Stephen Laltlansanga Auhmun, APO (M) chuan a kaihruai a, Pu P.C. Lallawmkima, President AMDEA chuan kalkhawmte hi a lo lawm a, Pi Rohnuni Colney, APO (WD) Serchhip chuan he hun hi lawmthu sawiin a khar a ni.