436/2026-2027

Lunglei the 8th May 2026: Vawiin khan 2 Mizo Battalion NCC te bultumin Lunglei Thuamluaia Mualah National Cadet Corp (NCC) Fest leh 2 BN MAP Ground-a Parasailing Camp neih mek chu Chief Minister Pu Lalduhoma chuan khuallian niin a telpui.

Thusawiin Chief Minister chuan, 2 Battalion NCC te hmalakna a fak a, kan thalai tam takten NCC zarah nun kawng dik an zawh a, ram tana mi hmantlak ni turin an inzir mek a ni. Mizoramin NCC Group Headquarters thar kan nei tawh a, phur takin hma an la, hna a thawk nasa a. Hun reilote chhungin an hmasawnna kan hmu nasa tawh hle. NCC a inhmang kan naupang tam takte hi sipaiah te, Police-ah te, Territorial Army ah te an lut tawh a ni.

Nu leh pate pawhin NCC hmalakna hi i thlawp ang u. Kan ramah ruihhlo a hluar avangin kan thalai tam takte nun a chhe mek a. Kaihruaitu tha an mamawh a. NCC hian thalaite kaihhruaina lamah tawn hriat an nei tha a, an thiam a, naupangte chu mahni inthunun thei, taima, tawrhchhel leh mi tumruh takah an chhuah thin. Sipaiah kal zui kher lo mah se an eizawnna kawngah an tangkaipuizui thin a ni, a ti.

Fest hmang tura thenawm state NCC Cadets lo kalte chungah lawmthu a sawi a. NCC chu hnam hrang hrangte inunauna tha zawk neihna hmun tha a ni, a ti. Fest hlawhtling tak buatsaihtu 2 Bn NCC chungah lawmthu a sawi bawk.

Fest-ah hian NCC lawmman hrang hrang sem a ni a, hnam lam entir a ni a, dawr (stall) tam tham tak hawn a ni bawk.

Chief Minister hi Pi Lalrinpuii, Health Minister leh Lunglei district MLA te Pu V. Malsawmtluanga, Pu T. Lalhlimpuia, Pu Lalramliana Papuia bakah Lt. Col Clement Lalhmingthanga te, Lunglei Municipal Council members te, Pi Navneet Mann, IAS, Lunglei DC leh district officials ten an tawiawm a ni.

Fest hi May ni 5 atanga ni 11 inkar neih tur a ni a. Mizorama NCC Fest hmasa ber a ni.

NCC Fest a telpui zawh hian Lunglei Health ATM, Lunglei District Hospital a mi chu a tlawh a, chumi zawhah Electric Venga Leitlangpui H/S a Astronomy Lab a tlawh leh bawk. Health ATM leh Astronomy Lab te hi Lunglei DC Pi Navneet Mann hmalaknaa CSR sum atanga hmuh an ni.