437/2026-2027

Dated Aizawl: the 8th May 2026 : Vawiin khan Disaster management & Rehabilitation Department changtu Minister Prof. Lalnilawma chuan P&E Department Conference Hall, MINECO-ah, Indian Red Cross Society,Disaster Management & Rehabilitation Department, Mizoram Taxi Association leh Shalom Society-te tangho buatsaih, World Red Cross Day 2026 hmanhona chu khuallian niin a hawng a. Kumin World Red Cross Day puala Taxy driver thlan chhuahte hnenah chawimawina thilpek a hlan nghal a ni.

He hunah hian khuallian DM&R Minister Prof. Lalnilawma chuan thusawiin, a vawi khatna atana World Red Cross Day Mizorama hman a ni chu lawmawm a tih thu a sawi a. Mizoram Taxi Association-te nena World Red Cross Day programme hmanho chu inhmeh leh tangkai hle a a hriat thu sawiin,midangte tana inpekna chu mihringte nih phung ropui tak a ni tih a sawi a. Minister chuan World Red Cross Day 2026 hmanna chu Mizoramin bung thar a kaina tur a ni a ti a. MTA member-te chu Mizoram hmel tilangtu an ni tih hre reng tura chahin, WRCD 2026 puala training chu hlawkthlak tak a hmang tur in duhsakna a hlan nghal a ni.

World Red Cross Day hi kum tinin thupui thlan chhuah neiin khawvel pumah May ni 8-ah hman thin a ni a. Kumin WRCD thupui chu "united in humanity"/mihring mihrinnaa inpumkhatin tih a ni. He ni hi khawvel hmun hrang hrang a Red Cross member, midangte tanpuina atana nun hlante hriat rengna hun atan te, midangte tanpui tur a inzirtirna ni atan leh Red Cross kalphung inhrilhhriatna hun atante hman thin a ni a. World Red Cross day 2026 pual hian IRCS, Mizoram State Branch chuan Mizoram Taxi Association member-te tan 1st aid training a buatsaih a ni.

Vawiina World Red Cross Day 2026 hawnna pual hian MTA member, an eizawnna kawnga mi chhuanawm tak tak Taxi driver thlan chhuahte hnenah chawimawina thilpek hlan niin, chung mite chu:

1. Vanlalhruaitluanga, Bethlehem Vengthlang.
2. Pu P. Lalpianmawia, BVT.
3. Pu P.C. Lalhruaitluanga, Bethlehem Veng leh.
4. Pu Zonunsanga Varte, Khatla South-te an ni.

Vawiina World Red Cross Day 2026 hawnna hun hi Dr. Chawnglungmuana,Secretary, IRCS  (Mizoram Branch)-in kaihruaiin, kalkhawmte lawmna thu a sawi a. Pi K. Lalrinzuali,  Chairman, IRCS (Mizoram Branch) hnen atangin thusawi ngaithlak a ni a. MTA member htlanchhuahte hnena chawimawina thilpek hlanna neih niin, Pu K. Lalrinliana, President,  MTA hnen atangin thusawi ngaihthlak a ni a. Hemi zawh hian IRCS (Mizoram Branch) life membership hlanna neih a ni a. Dr. Benjamin Lalrinpuia, Jt. Secy, IRCS (Mizoram Branch)  chuan lawmthu sawiin hawnna hun hi atitawp a ni.