January ni 24, 2016 atanga Kottayam, Kerala a hman tan, Church of South India (CSI) hnuaia Madhya Kerala Diocese Annual Convention chu vawiin a tawpna ni hian Chief Minister Pu Lal Thanhawla chuan CSI in tel ve tura an sawm angin a hmanpui.

Chief Minister hian he hun chhim ve tura CSI hotuten an sawm chu lawmthu a sawi a. Pathian thuchah a sawi bawk a ni.

Church of South India hnuaia Madhya Kerala Diocese hi ni 27th Sept. 1947 khan din a ni a, tunhma lam chuan Anglican Diocese of Travancore & Cochin tia hriat thin niin, CSI hnuaia Diocese 24 zinga pakhat a ni. Tunah hian India ram chhungah ringawt member 2,75,000 vel an awm mek a, pastorate 111 awm bawkin district council 11 a awm bawk a ni. Heng bakah hian school leh college engemawzah enkawl lai an nei bawk a ni. Tunah hian hotu Dy Moderator of CSI & Bishop of the Diocese ah Rt.Rev Thomas K.Oommen a ni mek bawk.

Vawiina inkhawm tel ve mi pawimawh, Kerala Home Minister Ramesh Chennithala leh Transport Minister Thiruvanchoor Radhakrisnan te an tel bawk a ni.

Chief Minister hi naktukah Mizoram mamawhte thawk turin New Delhi a pan ang.