January ni 30, Inrinni khan Deputy Government Chief Whip leh Sakawrdai Assembly Constituency bialtu MLA ni bawk Pu R. L. Pianmawia chuan Mauchar ah NEEPCO ina Corporate Social Responsibility kaltlanga khawtlang tan Community Hall an sak sak chu a hawng.

Community Hall hawnna inkhawmah thu sawiin Pu R. L. Pianmawia chuan Mauchar khawtlang leh thalai tan Community Hall sak anih leh hawn ani ta hi a lawmawm a, khawtlang tan ni chhinchhiahtlak tak niin ka hria, a ti a. Mauchar mipui ten he Hall hi tangkai taka hmang turin ka chah duh che u a. Kawng hrang hranga thalai te tan inzir chhuahna hmun, an thiamna leh theihna te tihpunna hmun anih ngei ka beisei a. Hall thar hi khawtlang mitin ta a ni a, chuvangin mahni ta angin duat leh dimdawi taka enkawl turin ka chah duh che u a ni, a ti bawk.

Pu R.L. Pianmawia chuan kalkawng chungchang pawh sawi langin ruahmanna awm mek ah chuan National Highway Mauchar tlangdungah hian kal tur a ruahman mek a ni a, Mauchar pawh hi National Highway hian a paltlang ngei dawn a, khawtlang mipuite lo in ruahman a harsatna siam lo turin ka ngen duh che u a ni, a ti a. Zirna chungchanga khawtlangin High School an dil chu hma lakpui tiamin School Education hotute nen he thil hi sawi hova Maucharah RMSA hnuaiah High School din a nih theih ngei na turin theihtawp a chhuah tur thu a sawi lang bawk.

Mauchar leh a chheh vel ram hi hmunphiah that duhna hmun leh mimal pawhin hmunphiah hmun zau tak tak a neih avangin a hralh chhuah na lamah harsatna a awm loh nan Pu Kawlhnuna DFO, Darlawn in he hunah hian hmunphiah chingtute hma lak dan tur kawh hmuhin a hrilhfiah a ni.

Mauchar Community Hall hi NEEPCO in khawtlang rawngbawlna chi khat Corporate Social Responsibility Scheme kaltlanga cheng nuai 43 senga an sak a ni a, a dung hi feet 93 niin a vang hi feet 46 a ni a. Hall sak dan chanchin tlangpui hi Dr. Saikia, Manager, NEEPCO chuan sawiin Mauchar mipuite tha taka an hnathawh an tawiawm thin avangin lawmthu a sawi bawk a ni.

Pu R. L. Pianmawia hi Pu Lallawmkima SDO(Civil) , Sakawrdai; Pu Lalchungnunga, Deputy Director, School Education Department; Pu Rodingliana SDO, PHE Department; Pu Kawlhnuna, DFO, Darlawn; Pu Lalengzama, SDO, PWD leh Pu R. Lalramhluna, Deputy DPC (RMSA) ten an tawiawm a ni.