Mizo thalaite tana sipai lak runpui kal mekah tukin zingkar atang khan Rajiv Gandhi Stadium, Mualpui, Aizawl-ah physical test paltlang tawh leh document fel tawhte chu sipai doctor hmun hrang hrang atanga lo kalte chuan medical check-up an neihpui a ni.

Army Recruiting Office (ARO) Director Col. Sameer Sharma chuan sipai lak runpui hi February 1, 2016-a zawh fel vek tum a nih laiin, Mizoram Youth Commission Chairman Pu T. Sangkunga’n a lo ngen tawhna angin online registration ti lote tan tun tum atan chauh hian hun remchang siamsakin, naktuk February 2, 2016 thleng hian hun pawh seisak an ni a; medical check tur pawh an la awm tur thu a sawi a. Medical test paltlangte hian February 28, 2016-ah written exam an neih leh tur thu a sawi lang bawk a ni.

ARO Director chuan Written exam hi darkar khat chhunga zawhna sawmnga, mark hnih theuh pu, Optical Mark Reader (OMR) Sheet-ah option pali atanga a dik ber chu thai (mark) tur a ni tiin, candidate-te chu negative marking (50% deduction) a awm dawn avangin fimkhur hle turin a chah a. Question sawmparuk (16) thiam chuan pass mark sawmthumpahnih (32) chauh chu awlsam tea hmuh theih a nih thu leh a chhanna kan hriat loh zawhna erawh chu negative mark a awm avangin risk a tih chi dawn loh va, uluk leh zuala inbuatsaih a ngaih tur thu a sawi bawk.

Tun tuma sipai lakna turah hian thalai 900 velin tlan an paltlang a. He’ng atang hian kawng eng kima an tlin vek chuan mi 550-600 vacancy awm chu fill up a nih tur thu ARO Director chuan a sawi bawk a ni.