Nimin tlai dar li dawn khan Chief Minister Pu Lal Thanhawla chuan Mahindra & Mahindra Showroom, Full Range Dealership, Mana Motors tia vuah chu Bawngkawn, Durtlang Road, Greenwood Hospital bul ami chu a hawng.

Hawnna inkhawm Showroom-a buatsaihah Chief Minister chuan hetiang showroom tha hawn theih ani chu a lawmawm hle a, ram hmasawnna kawnga rahbi pakhat a ni a ti a. Kan ram hi a thang nasa hle a, hmarchhak stateah chuan thang chak ber pawl niin, GDP pawh 11 % a ni a ti a, motor neihah phei chuan thang chak ber kan ni a ti. Kan motor kawng erawh a zau tawklo a, traffic tihziaawm dan kan ngaihtuah reng a, flyover leh leihnuai verhte lah atih chiin alang siloa, cable carte a awm thei ang em tihte ngaihtuahnaah a awm thin a ni a ti.

Chief Minister chuan hmasawnnaa intlansiakna ah engtinnge kan hmachhawn theih ang tihte ngaihtuah angaih thu a sawi a. Mizoramah motor company hrang hrang an awm mek a, an inkarah inelna thianghlim awm thei se a duhthu Pu Lal Thanhawla chuan sawiin, a kalpuinaah ti mai mai loa, hmun danga an enkawl angin uluk leh fai taka enkawl thin nise tha a tih thu a sawi a. He Mahindra principal dealer leh showroom neitu Dr.Franklin Lalrinngheta sawiah dealer ni tura sum neih ringawt a pawimawh berlo tih a hriat theih a ni a ti a. He showroom hawn tak hi kan zavai atan a ni tih kan tlan a tha a ni a ti.

Principal Dealer Dr. Franklin Lalrinngheta (Marina) S/o Dr. Ringluaia, Electric Veng, Aizawl chuan dealership an hmuh dan sawiin, kum 2011 khan Mahindra & Mahindra Company hian Mizoramah dealer tur an rawn zawng tih a sawi a, chutah chuan diltu mi 15 zingah amah leh a team-te chu interview engemawzah an palltlang hnu leh midangte chu an paih thlak zel laiin a tawpah ni 11.11.2011 khan Mizorama Mahindra & Mahindra Dealer ni turin an ni chu an rawn thlang ta a ni a ti a. Tunah hian motor 40 hralh theihin a awm nghal thu a sawi bawk a ni.

Mahindra & Mahindra Company Eastern Zonal Head Deepak chuan Mana Motors Showroom hi India chhuahlam, Eastern India ah showroom tha ber a nih thu a sawi bawk.

Mahindra hian servicing centre Durtlang-ah an siam nghal bawk a ni.