Sangha chi tha Pangasius sing kua sang hnih chu Serlui B -ah sangha khawitu thlan bikten an khawi zui turin a bik taka siam tui chhunga khawina hmun Cage-ah dah a ni.

Tukin khan North Chawnpui khuaa sangha khawitu mi 24 te enkawl zui tur Cage 24 Serlui tuiah hian Fisheries Deptt. chuan an dah a, nimin khan Bilkhawthlira sangha khawitu mi 24 te enkawl tur cage 24 dah a ni.

Pangasius hi sangha tui leh thang chak tak a ni a, hetianga sangha khawi hi Cage Culture tih niin North east-ah Mizoram hi tih hmasak berna a ni. Sangha chi tha Pangasius khawi hi Fisheries chuan hun engemaw chen kalta atang khan Serlui B ah hian bul an lo tan tawh a. Len te zar lawkin a khawina tur hmun hi Kolasib DFDO hovin an lo buaipui tawh a. RKVY scheme hnuaia tih niin a khawi tur hian Chawnpui atangin mi 24 leh Bilkhawthlir atangin mi 24 thlan an ni. Tun tuma sangha chi tha Pangasius dahna hun hi Pu K. Thanzama, Secretary Fisheries chuan hmanpuiin Govt. of India aiawh leh Kolasib leh Aizawl atangin Fisheries Deptt. mite an tel bawk a. Bilkhawthlir leh N. Chawnpui atangin sangha khawitute an tel bawk a ni.

RKVY scheme atanga thawh Cage culture hi cheng nuai 64 senga hma lak a ni a. Sangha tui leh thang chak, hrisel leh thianghlim khawi pun a nih theih nana tih niin sawrkar chuan hma a la a; a hlawkna za-a 75, 75% chu a khawitu farmer in a tel tur niin a chhut a, sawrkar pawhin hlawkna 25% a tel ve dawn a ni.