Mizorama in hmun, ram leh document pawimawh tak tak felfai tak leh hlawk zawka chhinchhiah anih theih nana din Directorate Of Registration & Stamp chu vawiin khan Chief Minister Pu Lal Thanhawla’n a hawng.

He Directorate thar hawnna inkhawm Aijal Club-a neihah hian Chief Minister chuan ram hmasawn nana Project duan hrang hrangte kut tlinglo a sum lakluh duh tu te avangin compensation-ah sen teuh angaih thin thu sawiin hei hian hmasawnna a ti thuanawp thin a ni tiin, Directorate Of Registration & Stamp hnuaiah ram neih chungchangah te chhinchhiahna fel tak a awm tawh dawn avangin hetiang harsatna hi a kiam a beisei thu a sawi. Official ram vei tak leh ram hmasawnna tura thil thar ngaihtuah chhuak thiam Mizoramin a nei chu lawmawm a tih thu a sawi a. Directorate thar hian revenue hmuhnan leh document diklo leh fel lo laka fihlim nan hman tangkai a nih ngei a beisei thu a sawi.

He huna Khualzahawm Revenue Minister Pu JH. Rothuama pawhin he directorate thar hawn a nih chu lawmawm a tih thu sawiin, Mizoram tan rahbi thar pawimawh tak a ni, a ti. Minister chuan “revenue tam tak kan lakluh theihna tur a nih bakah documents lem hmanga inbumna leh thubuai tam tak kan neih te pawh a ti tlem dawn a ni”, a ti. Land Revenue administration atan phei chuan he thil hi a pawimawh lehzual a ni, a ti.

He hunah hian Mizoram Legislative Assembly Speaker Pu R.Romawia pawhin mellung pawimawh sawrkar leh mipui tana hlawkna tur leh chhenfakawm tak tur a piang ta chu lawmawm a tih thu a sawi.

Pu R.L.Rinawma, Principal Secy, Revenue Dept & Ex- Officio Director General Of Registration & Stamp chuan inlawmna thu sawiin he hun hi a hawng a, Directorate Of Registration & Stamp hawn anih theih nana hmalak dan leh Mizoramin a mamawh dan leh a hlawkpui dan tur te a sawi a.Registration & Stamp administration mumal Mizoramin a neih loh avanga sum tam tak revenue ang a a hmuh tur a hmuloh rei tawh thu te a tarlang a. Pu R.Zarzosanga, Director, Land Revenue & Settlement-in lawmthu sawiin inkhawm hi a khar a ni.

Directorate Of Registration & Stamp hian The Registration Act, 1908 leh The Stamp Act,1899-in thuneihna a pek ang leh khawih tur chin a tih ang zawng zawng a khawih dawn a ni. State sawrkarin a huam chin item a ti danglam thei bawk a. Revenue tam tak hmuhchhuah theih beisei anih bakah ram lei leh hralh kawngah inbumna a tlem phah beisei a ni bawk.

Directorate Of Registration & Stamp hi Revenue Directorate building-ah an innghat hrih ang a, thawktu pawh Revenue Officer leh staff ten an lo hmui rih ang a, tin, Revenue Department administrative enkawlna hnuaiah an awm dawn a ni. Principal Secretary, Revenue hi Ex-Officio Director General a ni ang a, Director, Land Revenue hian Inspector General Of Registration & Stamp a kawp bawk ang.