Vawiin khan chhim bial - Lunglei, Lawngtlai leh Saiha - enkawltu tur Jt.Director, Accounts & Treasuries (Southern Zone) leh Lunglei Treasury Office building tharte chu Finance Minister Pu H.Liansailova’n a hawng a. Jt. Director Office leh Treasury Office hawnna inkhawm chu Finance Commissioner Pi L.N.Tochhawng-in a kaihruai a, Lunglei HPC Vice-Chairman Pu Joseph Lalhimpuia pawh he hun hian Special Invitee a ni.

Hawnna thu sawiin Khuallian Pu H.Liansailova chuan Mizoram Chief Minister Pu Lal Thanhawla leh Lunglei District Bialtu MLA-te thahnemngaihna leh remhriatna avangin sorkarin Lunglei leh chhim biala mipuite awlsam zawkna atana a hmalakna a ni a, thil chhinchhiah tlak tak leh ngaihhlutawm tak a ni, a ti. Jt. Director (Southern Zone) din a nih takah chuan Lunglei, Lawngtlai leh Saiha district chhunga pension chungchanga harsatna an tawh thinte chu awlsam zawka sutkian a nih theih tur a sawi a. Mizoramah sum leh paia harsatna awm thin chu sorkar leh mipuite pawhin inrenchem nachang kan hriat a, sum awm ang ang chu dik tak, tangkai tak leh ram hmasawn nana a hlawk thei ang bera kan hman thiam hi a pawimawh zawk a ni, a ti. Kumin chhunga NLUP atana hman turin sorkar laipui chuan cheng vaibelchhe 370 a pek thu sawiin Finance Minister chuan NLUP hi a thlawna sum semna a ni ringawt lova, chhungkua harsa tak tak engemawzat te tan eizawnna ngelnghet an neih theihna tura sorkarin bul a tan sakna leh an dinhmun khaichhuahna tura ruahmanna a ni a; hun reilote chhungin NLUP avangin Mizoram chhungah sum leh thildang dehchhuah a pung a ni, a ti bawk. Vawiina Office thar 2 hawn takte chu a hun taka zawhfel a ni thei chu lawmawm a tih thu leh PWD-te hmalakna chak tak avangin lawmthu a sawi bawk.

Lunglei HPC Vice-Chairman Pu Joseph Lalhimpuia chuan kum 23 kalta khan Lunglei leh chhim bial atan High Powered Committee chu din ni mahse hun rei tak mumal lova a kal thu leh kum 2009 February thla atang chauhin ‘financial head’ hran pek an nih thu a sawi a. State Budget-a ‘divisible outlay’ atanga 1% hi Lunglei HPC tan dah a nih tawh thu leh an ngenna avangin sorkarin Lunglei Treasury Office-a ni khata sum a khawih theih chin chu cheng nuai 40-ah a bithliah chho ta a ni, a ti bawk. Sorkar laipui hnuaiah Ministry hrang hrang ten hmarchhak bial tana zaa 10% chu lumpsum grant-ah an dah thin a, hemi sum hmang hian Lunglei-ah ngei pawh Stadium, Shopping Centre te leh hmasawnna thildangte kalpui mek a ni, a ti a. Finance Minister leh Finance Department duhsakna avanga chhim bial tan Office thar 2 hawn chungchangah Pu Joseph Lalhimpuia chuan lawmthu a sawi bawk.

Finance Commissioner Pi L.N.Tochhawng pawhin thu sawiin tun hma chuan AG Office, Shillong-in Officer’s record leh Entitlement te a enkawl thin a, Pay Slip neih a harsat avangin hun rei tak tak hlawh la thei lovin harsatna tawh a nih thin bakah Pension leh retirement benefits te pawh Shillong-ah umzui zel a ngai thin a ni, a ti a. Chuvang chuan Mizoram sorkarin kum 1981 atang khan officer’s record leh entitlement te chu a laksak a, kum 1983 atangin Pension, GPF, GIS te lak leh a ni a; tunah chuan thenawm state thenkhatte chu Shillong AG kutah an la innghah laiin Mizoram chuan mahni state chhungah ngei Accounts & Treasuries Department neiin engkim kan chingfel thei zel a ni, a ti bawk. Sorkar hnathawk, an that lai hun zawng zawng sorkar tana hmang zotu ten an Pension, insengso lo thei ang bera, a hun taka an lak theih nan Jt.Director Office thar hi hawn a nih thu a sawi bawk.

Vawiina hawn tak Jt.Director, Accounts & Treasuries, Southern Zone Office hi Lunglei, Saiha leh Lawngtlai District chhunga awmte tana buatsaih a ni a. Tunah hian Lunglei District-ah Drawing & Disbursing Officer (DDO) 103, Saiha district-ah DDO 43 Leh Lawngtlai District chhungah DDO 37 an awm mek a. Heng Heads of Office te hian retirement benefit hrang hrangte an buatsaih fel hnuah, hmun dang kaltlang ngai lovin Jt.Director (Southern Zone) hnenah an thehlut thei tawh dawn a ni. Southern Zone-a Jt. Director tur hi Pu Vanlalsawma, MFAS a ni a, amah hnuaiah hian Asst. Director 2 - Pu R. Lalhmachhuana leh Pi Lalnghakliani - leh hnathawktu dang engemawzat dah thar a ni.

Vawiin veka hawn thar, cheng 68,14,350/- senga zawhfel, Lunglei Treasury Office thar chu ni 3.5.2011 khan sak tan niin ni 2.8.2012-ah zawh a ni. Treasury Office hi chhawng 2 a ni a, a hnuai (Ground floor)-ah Strong Room, Record Room, Guard Room leh Parking Area te a awm a; a chung (First floor)-ah Treasury Officer Room, TA&ATA Room, Establishment Section, Compilation Section, Bill Section, Visitor Area leh Toilet 5 a awm a ni. Tuna Lunglei Treasury Officer hi Pu Lungmuanpuia, MFAS a ni.