Aizawl khawpui pawna a hmasa ber ni turin Ran talhna In (Rural Slaughter House) Rs.Nuai 245.60 a sak chu Serchhip District Bawrhsap Pi Juhi Mukherjee, IAS chuan vawiin chawhnu dar 2:30 khan Serchhip Mualvawm-ah a hawng.

Hawnna thu sawitu Bawrhsap chuan Serchhip mipuiten Sa hrisel leh thianghlim zawk an ei theihna tura ‘Sa talhna In’ hawn a ni ta chu Serchhip ten thil chhinchhiahtlak tak a ni a, Mizoram Sawrkarin Serchhip mipuite hmakhua ngaia hamthatna chi hrang hrang a ruahman sak chu mipuiten chhawr tangkai thiam turin leh hmasawn nan hmang ngei tura a duhsak thu a sawi a, Sa talhna hmun hi khaw daifem anih vangin Sa zuarte pawhin an sa talh tur te Sa talhna hmuna an kaih a ngaih dawn vanga rilru hnual mai lo tur leh mipui vantlang hriselna tur leh kan vaia tana tha tur a ni tih hria a tlemte in pek deuh ngai chu mipui rawngbawlna a ngai turin a ngen bawk a ni.

Serchhip-a Animal Slaughter House hi Mizorama Slaughter House pathumna niin, Aizawl pawn lamah chuan a hmasa ber a ni a; NABARD Loan kaltlanga sak niin, a sakna atana senso 90% hi NABARD loan atanga hmuh niin, a bang 10% chu Mizoram Sawrkarin a tum ve thung a ni. Rural Slaugther House sak hna hi chi hnih a then a ni a, Civil Engineering Works hi Corner Stones Associates, Mission Veng, Aizawl ten an thawk a, hemi atana senso hi Rs. 107.553 lakhs a ni a. Machine Works (khawl bun leh a kaihhnawih) hi Rs. 108.339 lakhs in Abbatoir & Allied Engineers, Ohaziabad, Uttar Pradesh ten an thawk a ni. Hei bakah hian Power Supply (11 kv Transformer etc.) atan Rs. 16.50 lakhs. Technical Survey, Insurance etc., atan Rs. 4.60 lakhs leh Miscellaneous expenses ah Rs. 8.608 lakhs sen ral a ni bawk.

Ran Talhna In hi Serchhip Bazar Sa zawrhna atanga kilometer 5 vel a hla Mualvawm-ah a awm a, Ran talhtu ten an ran te he hmunah hian an kai thla ang a, Vety Department a ran talh tura a bika zirtir chhuah ten ran hi an talh ang a, ran talh sa Bazar-a zawrh tura phurh let na man hi Vety. Department chuan a tum vek dawn a ni.

Vawiin Ran Talhna In hawnna inkhawm hi Dr. Vanlalenga, DVO in a kaihruai a, R. Lalthanzauva, AE in Technical report a pe a, Serchhip Joint VC Chairman Pu Lalramliana Sailo leh Sa Zuar Association aiawh ten thu an sawi a, Dr. Lalmakthanga, Fodder Development Officer in lawmthu sawina hun hmangin hnu a khar a ni. Vawiin Rural Slaughter House hawnna ah hian Serchhip-a Sawrkar Pisa hrang hrang hotute leh mipui aiawh Village Council member te an kal tha hle a ni.