Education Minister Pu Lalsawta chuan vawiin khan RMSA sum hmanga sak, Govt. Chaltlang High School building thar a hawng a. Hemi rual hian a vawikhatna atana an school malin Science Exhibition an buatsaih kharna hun hmangin, he exhibition-a ti tha zual pathumte hnenah lawmman tangkafai a hlan nghal a ni.

Pu Lalsawta chuan RMSA hnuaiah Govt. Chaltlang High School-in zirna in phuisui zawk a nei thei chu lawmawm a tih thu a sawi a. Govt. Chaltlang High School chu Mizoram Sorkar hnuaia zirna in tha ber te zing ami a ni tiin, an building thar te chu zirna lama hmasawn nan an hman tangkai zel a beisei thu a sawi bawk. Education Minister chuan zirna lama hmasawn tur chuan zirna dik tak, chhawr tlak leh hman tlak siam chu a pawimawh ber a ni a ti a. Zirlaite hnenah chuan an zirtirtute leh zirna kawnga hma latu ten hna tha tak tak thawk mah se, an hmalakna zawng zawng tihlawhtlingtu tur chu anmahni bawk a ni tih hrilhin, taima takin an zirna kawngah bei zel turin a fuih bawk a ni.

School building thar hawnna inkhawm hi Pu B. Lalchhuanliana, Addl. Director, School Education Department chuan kaihruaiin Pu C. Lalremruata, Secretary, SMDC chuan building sak dan tlangpui report a pe a. Pu C. Chawngthantluanga, DSPD, RMSA chuan lawmthu sawiin inkhawm hi a khar a ni.

Govt. Chaltlang High School hi RMSA scheme pakhat "Strengthening of Existing School Building" hmanga sak a ni a. He building hi cheng nuai 14. 29/- a sak niin, feet 660 bial a zau a ni a, chhawng hnih awmin a chung zawkah Computer leh Library Room awmin, a hnuaiah Art & Craft room leh zirlai mipa leh hmeichhe tan inthiarna awm tur a ruahman a ni. Mamawhna in a nawr avangin RMSA building chungah hian School-a thawktute thahnemngaihna in School pawisa hmanga room pakhat sak belh bawk a ni.