Mizoram Geology & Mineral Resources Service (MIGSA) chuan vawiin khan a vawi khatna atan Directorate of Geology & Mineral Resources Conference Hall-ah General Assembly an nei a. He hunah hian Parliamentary Secretary Pu Lal Thanzara chu Khuallian a ni.

Pu Lal Thanzara chuan MIGSA General Conference hmasa ber a tel tur a sawm a nih chu lawmawm a tih thu sawiin, Geology & Mineral Resources Department chu hna tangkai leh hautak tak tak thawk thin, Sorkarah pawh sum chhunglut tha tak department a ni, a ti. Parliamentary Secretary hian inthlan dawn hnaih denchhen a pawl hrang hrang atanga sorkar laka thil phut awm thin chu sawilangin, sorkar leh mipuite hi hrang lutuk anga ngaihdan a awm vang te pawh a ni thei a ni tiin, sorkar chu mipui siam a nih angin mipui ta a ni tih chu hrechhuak leh thei ila a tih thu a sawi a. Chutihrual chuan sorkar hnathawkte chu politics tui nu a inchiah lova, neitu rilru pu in sorkar hmalakna te chu thahnemngai taka kalpui turin a chah a; hlawhtlinna tawng baw tur chuan taihmak a pawimawhzia sawiin, thawk lova sum hmuh tum te, kut tlinglo taka hausak te chak lo turin a fuih bawk a ni.

General Assembly hi Pu J. Chamliana, MIGSA Treasurer-in kaihruaiin, Khuallian bakah hian Pu Lalthazuala, MIGSA President, Pu Lalhmachhuana, Jt. Director, Geology & Mineral Resources leh Pu Laltanpuia, Mizoram Industries Service Association Secretary ten thu an sawi bawk. MIGSA Secretary Pu Lalruatkima chuan report a pe a, association member thi tawhte sunna hun hman a ni bawk.

Conference-ah hian MIGSA hruaitu tur thlanna neih a ni a, inthlanna hi MJA in a buaipui a ni.

Geology & Mining hi kum 1980 atang khan Industries Department hnuaiah cell pakhat a bul intanin, September ni 1, 2010 atang khan Department hrang changin Directorate of Geology & Mineral Resources vuah a ni ta a ni.