Tukin zing khan Chief Minister Pu Lal Thanhawla chuan AH &Vety Department hmun Mampui ah ran vulh lama a tihpunna lamah hma lakna thar pathum - ar note awp keuna tur Hatchery Farm, bawng no vulh puitlinna tur Calf Rearing Farm leh vawkpui vulh atanga a note tihpunna tur Pig Multiplication Farm te chu a rualin hawngin helai hmun hian ran vulhna lamah Chhim lam tan malsawna a thlen a beisei tih a sawi.

Chief Minister Pu Lal Thanhawla chuan Lai rama Chanchin Tha a thlenna hmun hmasa ber Mampui ah AH & Vety. Department hma lakna a ran tih punna din thar thil pathum hi Chhim lama hmasawnna mellung pawimawh tak tukna ni tiin helai hmun hian ran vulhtu mamawh phuhruin an tan malsawmna a nih a beisei tih a sawi. Politics inlum letin mihring nun kawng tin rengin nghawng a, angkhatin min hrut vek ah, khawvel kan awm chhunga kan inrelbawlna leh inenkawlna hmanraw pawimawh tak anih angin dawt leh hmui daw thei te hi a leng lo, dikna leh takna nen Pathian malsawmna, Ah kaihhruaina in Amah lam hawin he hna hi kan kalpui tur a ni, a ti.

Chief Minister chuan Independence hmain Mizoram leh Mizote chhuahka ber chu Chhim lam an ni thin a mahse chhan hrang hrang avangin Hmar lam hi chhuahka a ni ta a, Chhim lam chhuahka anih leh thei nana hmathlir thui tak Sawrkarin a neih thin chu UPA leh NDA Sawrkar ten phurpuiin Look East leh Act East Policy ah te khungin he inkawlpawlhna leh insumdawntawna atana ruahmanna hi an ngaipawimawh a, chuvangin Kaladan Multi Modal Project kaltlangin Chhim lam hi Mizoram chhuahka ber atan buatsaih mek a ni a, keini ai zawkin a hmang tangkai tur kan ram thenawm te hi an phurin an ngaihven a, a puitlin hun tur an nghakhlel hle a ni, a ti a. He Project hlawhtlin zelna atan rel kawng pawh Sairang pelh Kawrpuichhuah he te Chhim lam thleng Act East Policy hnuaia ruahmanna hrang hrang te tha leh hlawk zawka kan dawnsawn thei nan a bik takin Chhim lama cheng Lai, Mara leh Chakma unaute hian in rilru leh in ngaihtuahna te in buatsaih a tul a ni, a ti. Ram leilung fate hi Mizoram khawi hmunah pawh awm ila a neitu nihna leh mawhphurna inchen nei vek kan ni a, ram leilung fate tan inthlahrunna leh inkiltawihna tur a awm lova, hmun kilkhawr leh hmun laili a awm ten rualkhai taka hmasawnna kan neih leh a thlen a pawimawh a, intluk tlanna kan neih loh chuan kan ram hi kan hlim tlang lovang tih a hlauhthawn awm a ni, a ti. Sawrkar programme thar New Economic Development Programme (NEDP)

NLUP chungchang sawiin NLUP hian mipuite tan eizawnna ngelnghet siamsak leh ei leh bara intodelhna tur thlen piah bakah tunlai khawvel in a buaipui mek ram ngaw siam that, tui hna humhalh boruak chhe mek ven zel te hi a fuankim vekah, hei hi tha tiin UNO lam pawhin an rawn ngaihven a, Aizawl a Pisa te pawh an hawng tawh a ni tiin University of Minnesota mithiamte pawhin an zirchian thu a sawi a. NLUP a hlawhtling fumfe lo leh tang te puihna turin leh Mizoram chu ei tawk tawk economy (subsistence economy) atanga hralhchhuah tur nei economy(market economy) a buatsaih turin programme thar New Economic Development Programme chu hman tum anih dante a sawi a. Sawrkarin in mipuite tan a thawh dan leh hmasawnna hna thawh mek hrang hrangte a sawilangin Mizo te hi Pathian laka mi bik kan ni a, khawvelah thil siam zawng zawng hnenah Chanchin Tha hril tura thlan leh kohchhuah hnam kan nih angin kawng engkimah midangte tan entawntlaka kan awm a pawimawh a, malsawm tlaka kan awm a ngai a, a thinurna tawngbaw lova a malsawmna zawk tawngbaw turin kan kawng te hi kan chhut ngun a ngai a ni, a ti. Kut tling lova sum lak tum ten hmasawnna hna an tihsukuk dan sawiin sum ngaina hnama kan tluk luh loh nan kan rilru leh kan ngaihtuahna te fim leh dik tak kan hman a pawimawh a ni, a ti. Hnam hriselna lo tak kan nih te leh zuk leh hmuam ti nasa hnam kan nih te hi kan enchian a tul a, heng thil avang hian min ko tu Pathian hming ka ti hleu a, Ringtu zawn atanga hei hi kan ngaituah a pawimawhin a tul hle a ni, a ti bawk.

Heng ruahmanna thar hawnna inkhawm Mampui-a A.H.& Vety. Farm a neih hi A.H. & Veterinary Department enkawltu Minister Pu C. Ngunlianchunga'n a kaihruai a. Programme ah hian UD&PA Minister Pu Zodintluanga, Horticulture Minister Pu PC Lalthanliana, Parliamentary Secretary Pu H. Zothangliana, Mizoram Women Commission Chairperson Pi Vanlalawmpuii Chawngthu te bakah Lai Autonomous District Council (LADC) CEM Pu VL Hmuaka leh thawhpui EM leh MDC te; Chakma Autonomous District Council (CADC) EM leh Chairman leh Mara Autonomous District Council (MADC)-a EM te an tel bawk a ni.

Mampui ah Hatchery Farm hi Social Welfare Department kaltlanga Ministry of Tribal Affairs tanpuina sum cheng nuai 125 hmanga din a ni a. Thla tin ar note 5000 vel awp keu turin a hmun hma te hi buatsaih a ni a. Siaha leh Lawngtlai District-a ar vulhtu ten ar note an mamawhna a phuhru thei beisei a ni. Bawng no vulh puitlinna hmun Calf Rearing Farm hmun hma hi cheng nuai 29.90 senga buatsaih niin bawng no 50 in a bultan a ni a, hemi atan hian National Programme on Bovine Breeding in a sum hi an tum a ni. Vawk note tihpunna atana Strengthening of Piggery Farm hnuaia Pig Multiplication Farm hi cheng nuai 34 sengin a hmun hma te buatsaih niin vawkpui 50 atanga bultan a ni a, nakum a vawkpui 30 dang dahbelh leh tum a ni. He sum petu hi Ministry of Agriculture & Farmer's Welfare hnuaia awm National Livestock Mission a ni.

Attachment

  • Loading attachment...