‘Eternity Partners’ bultum leh buatsaih, Olympic Bronze Medallist Mary Kom chawimawina nimina Aijal Cluba neihah, Chief Minister Pu Lal Thanhawla chuan Mary Kom hnenah chawimawina thilpek leh sum cheque in Rs. 6 lakhs a hlan.

Chief Minister chuan Mary Kom chu khawvel hmeichhe boxing-a mi chungchuang anihna hian India a chawisang hle a ni, a ti a. A tumruhna leh a thawhrimna avanga hetiang dinhmun sanga ding thei a ni tih a chiang a, thalaite tan zui tlak anih zia a pholang a ni a ti. Mizote zingah mi thil ti thei ten mi chungchuang nihna an sualchhuah thin,‘Thangchhuah’ tluk hiala Mary Kom hi ropui a ni a ti.

Chief Minister chuan Mary Kom chu Mizo hnahthlak ngei a ni tiin, Mizo a inti em tih erawh ka hre lo a ti a. Kom hnam pakhat nen Kolkata a an intawh tuma chu Kom pa sawi chu sawi chhawngin, ‘Kom hnam hi Mizo kan ni a, Mizoramah chuan Chawngthu an inti’ tih a hrilh thu Pu Hawla chuan a sawi a. Mizo te hi Ralleng ho aiin mahni hnahthlakte kan chuh chak loh nia a hriat thu sawiin, Mizo hnahthlak ngei thenkhatte chu Naga ah an inchhal hial tawh a ni a ti a. Chuvangin a tul chinah leh a rem chinah chuan kan chuh chak ve a tha a a hriat thu a sawi a ni.

Chief Minister chuan India ramah sports lama inthliarna, abikin hmarchhak mite lakah a awm thu sawiin, hetiang inenhranna karah dinhmun sang Mary Kom in a rawn chang thei hi a tumruhna leh a thawhrimna a fakawm tak zet a ni, a ti a. Olympic 2016 ah Mizo kan lan ve ngei theihna turin tun atang hian hmalakna kan nei tan mek a ni a ti.

Mary Kom pawhin Mizo tawng a thiam ang anga hmangin national level-a Mizo hmeichhia champion ni theite chu khawvelah a ber an ni thei tiin, kei pawhin ka thei anih chuan in theih lohna tur a awm lo a ni a ti a. Tunah hian Boxing Academy a hawn tawh thu sawi bawkin, amah chu head coach a ni ang tiin, a duh tan a luh theih vek a ni a ti. Mary Kom hian Mizo thalai infiammi ti tha 40 chuangte hnenah chawimawina thilpek a hlan bawk a ni.

Eternity Partners a khaipa, Harry Dhaul pawhin thusawiin, Mizo te chu thluak tha, taima leh muanna boruak siam duhtu an ni a ti a. India hmun tam takah Mizote hi awm darh hle nain, Mizoram hi mi tam zawkin an hrelo hi a mak hle a ni a ti a. Chuvangin Mizoram ngeiah hian kawng hrang hrangah project lian tham siam a ngai a ni a ti. Khawvel huapa inzar pharh, Eternity Partners hian Tourism leh Sports lamah Mizo thalaite tan hna siam a tum thu a sawi bawk.

Chief Minister Pu Lal Thanhawla chuan tukin khan a chenna bungalow-ah Mary Kom hi Breakfast a buatsaih sak a, sports association hotu ten an tawiawm a ni.

Attachment

  • Loading attachment...