Nimin chawhnu dar 4:00 khan Chief Minister Pu Lal Thanhawla chuan Dapchhuah khua atangin Cachar Paper Mill-a hman tur mau chan sawm sa (bamboo chips) truck phur 2 a vailiam. He mau thawnchhuah tak hi Daia Bamboo Chipping Industry, Dapchhuah khuaa sawngbawl a ni a; he programme-ah hian Industries Minister Pu S.Hiato, Parliamentary Secretary Pu H.Zothangliana leh ZIDCO Chairman Pu V..Lalrobiaka te pawh an tel a ni.

Industries Commissioner Pu R.L.Rinawma inkhawm kaihhruaiah hian Khuallian Pu Lal Thanhawla chuan Mizoram chu mauah kan hausa em em a, mau ringawt pawh hi kan hman tangkai thiam chuan kan thingtlang loneitute dinchhuah nan a tawk a ni, a ti. Hun kal tawh ah pawh mau hmanga eizawnna leh mau sawngbawlna lamah sorkarin kut a lo thlak tawh thin a, tunah hian Mizoram sorkar chuan awmze nei zawk leh hlawk zawka mau sawngbawl hna a kalpui mek a ni, a ti. Mizoram economy-ah mau hian hmun pawimawh tak a chan thu sawiin Pu Lal Thanhawla chuan mau hi Mizo mipuiten dinchhuahna atana kan hman tangkai theih a ni a, chuvang chuan kan humhalh that a tul a, hnamdang sumdawng ten mau mahal leh special permit behchhana kan ram mau duh tawk tawk an suasam thin chu Mizoram sorkarin kan ti tawp tawh a ni, a ti. Mizote chu Kristian vek kan nih avang pawhin thilsiam zawng zawng hnena chanchintha hril tur kan ni a, kan ramngaw leh nungchate chungah pawh ngilnei tur kan ni tiin Chief Minister chuan kan ram thing leh mau te duatna chang kan hriat chuan khawvel puma boruak, sik leh sa inthlak zung zung lakah pawh kan invenghim thei a ni, a ti bawk. Mau hmanga thilsiam leh sumdawnna lamah pawh nasa zawka tanlak tum a nih avangin NLUP hnuaiah pawh mi engemawzatin mau chin (bamboo plantation) an thlan thu leh mau sawngbawlna hmun dang pawh dinbelh a tanpui zel tum a ni, a ti. Industry din dawna pawimawh ber pakhat chu kawlphetha a nih tih hriain sorkar chuan hydel project engemawzat chak takin a kalpui mek a ni tih a sawi lang bawk.

Industries Minister Pu S.Hiato pawhin thu sawiin Mizoram hmun tinah mau kan ngahin a tha em em a, a hmain hman tangkai ngaihna hre vak lo mahila tunah chuan kan ram leh hnam dinchhuahna tur khawp Pathianin a thilthlawn min pek hi duatna chang hria a, tihpun leh hman thiam a pawimawh hle a ni, a ti. Leilung hausakna dang oil leh gas lamah pawh hmasawnna a awm zel a, survey 80% vel zo tawhin tunah hian Meidum leh a chhehvel-ah chuan beiseina sang tak a awm thu a tarlang bawk.

Industries Department hnuaia Bamboo Development Agency (BDA) tanpuina in Mizoram hmun hrang hrang 9 - Dapchhuah, Chuhvel, Bairabi, Chhingchhip, Maubuang, Muallungthu, Hortoki, Bungthuam leh Tuirini ah hian Bamboo Chipping Industry din a a ni a. BDA atangin tanpuina Rs.66.95 lakhs theuh loan pein bultan sak an ni.