Vawiin khan Chief Minister Pu Lal Thanhawla chuan Mizoram College of Nursing (MCON) Falkawn atanga Nurse zirchhuak batch thar ber te puala an pass lawmna graduation leh he Zirna In a zirlai lut tharte thutiam lakna programme ‘29th Graduation & Lamp Lighting Ceremony 2016’ buatsaih chu khuallian niin a hmanpui.

Chief Minister Pu Lal Thanhawla chuan nurse hna hi hna ropui berte zinga ami anih thu leh Ringtu nen pawha inhmeh tak, tisa bakah thlarau damna rawngbawlna hna anih thu a sawi a. Thil tha kan tihte ah hian thinglung takin hmangaihna leh duhsakna a tel em tih te hi kan chhut fo a pawimawh a, hei hi a bik takin damlo te enkawl thin nurse te nunah a pawimawh lehzuala, nurse passed chhuak ta te pawhin hei hi hre reng turin ka chah duh che u a ni, a ti a. An hnathawhna leh damlo te an enkawlna leh rawng an bawl sakna apiangah rinawmna, dikna, taimakna leh Pathian tihna nung nen an hnathawh chu hlenchhuak thin ziah turin a fuih bawk a ni.

Chief Minister chuan damlo te enkawlna kawngah doctor te an hlu in an pawimawh a, chutiang bawkin doctor te thachang dawltu nurse te pawh enkawlna leh damlo an bawihsawmna te avangin damlo ten an thatpui in an dampui thin a ni, a ti a. Damdawi In hmingthatna leh hming thanna te hi nurse ten damlo an enkawl danah thui tak a innghah thusawiin hei hi hi nurse passed chhuak te chuan hre reng tura chahin nurse zirlai tharte chu an thutiam hre renga, nurse hna azahawm zia leh a thianghlim zia te hre reng turin a fuih a ni. Export quality zirnakanneih dawn chuankanzirlai piah bakah tawng, a bik takin Hindi hi tunlaiahkanthiam a tul a, hei hi nurse, Mizoram pawna thawh tum te tan pawh a tul leh a pawimawh thu a sawi bawk a ni.

Mizorama damdawi in thenkhata tunhnaia thil thleng chu pawi a tih thu leh heng thil te hi thleng tawh loh se tia a duh thu te sawiin Chief Minister chuan nurse te chu an kalna apianga an hnathawh hi Krista chawimawitu leh ti ropuitu a ni tih hre reng turin a hrilh a. Mizoram thalai te tan Mizorama hna a van tawh vangin India ram chhung leh ram pawn thlenga thawk turin an rilru leh an ngaihtuahna te buatsaih a tul thu te sawiin hna thawk turah kan inthawn chhuah tam poh leh kan ram hi a changkang anga, kan hnam a zahawmin a ropui zel dawn a ni, a ti a. Hemi lamah hian Mizoram Youth Commission-in zirlai sang tam tak Mizoram pawna hnathawk tura a tirh chhuah thu leh thahnemngai taka hma a lak thu a sawi bawk a ni. 

He programme Pathian kuta inhlanna chu Rev. P.C. Lalbiaktluanga’n neiin MCON chungchang report chu MCON Principal Pi Lalchhanhimi hnen atangin ngaihthlak a ni a, Graduate Felicitation hi Pi Lalbiaksangi, Joint Director (Nursing) chuan kaihruaiin Pi Lalremmawii, Nursing Superintendent, Civil Hospital in zirlai thar 30 hnenah thutiam lakna chu a kaihruai a. Zirlai ti tha te hnenah Chief Minister hian lawmpuina a hlan bawk.

Kum 1980 khan Nursing School, Civil Hospital, Aizawl hi din niin he nurse zirna in hi college ah hlankai niin a hming chu Mizoram College of Nursing tia thlak a ni a. B. Sc (Nursing) zirna hmun a niin kumtin nurse zirlai 30 an la thin a ni. College a hlankai anih hnuin inluah tein College hi kalpui a ni a. Kum 2013 a Falkawna an building tur sak zawh anih khan an hmun nghet ah an in suan ta a ni.

MCON din tirh atangin graduate 230 an nei tawh a. An zirlai pass chhuak te hi Mizoram, ramchhung leh ram pawna damdawiinah an thawk mek a, Military Nursing Service ah he College chhuak Captain pahnih an awm mek a ni.

Kumin University Examination ah MCON zirlai pali  chu B.Sc. (Nursing) result ah Top ten ah an lang a. MCON zirlai J.H. Vanlalbeli chu University topper niin Distinction ah a passed a ni. Kumin hian MCON atangin zirlai 28 an passed chhuak a ni, heng zirlai Naupang thenkhatte hian campus recruitment kaltlangin Kolkata damdawi in Birla Hospital, CMRI leh a dangah te hna an hmu tawh a, an zinga mi 8 chu Singapore ah kal turin an in buatsaih chho mek a ni.

Tun dinhmunah MCON hian an mahni hmun nghetneiinCollegebuilding changtlung tak an nei a, zirlai naupang 200 len theihna hostel  sak mek niin peih fel tep tawh a ni. Zirlai 120 leh a nghet a thawk teaching staff Principal tiamin mi 22 an awm mek a, non teaching staff mi 29 an awm bawk a, guest lecturer 9 an nei mek bawk a ni.