Vawiin chawhma khan faina hapta, Cleanliness Week 2016, October ni 1 leh ni 7 inkara hman tur chu, Lunglei Addl. DC Pu JH Lalrimawia, MCS kaihhruaiin a pisaah Cleanlineess Week Committee member-te’n a hman dan tur an rel.

Committee chuan hawnna inkhawm hi October ni 1, zing dar 7:00 ah Mizofed dawr kawt a hman nise a ti a, a kharna inkhawm ve thung chu Convention Centre, Lungleiah October ni 7, chawhnu dar 1:00 ah neih nise a ti a ni. He inkhawmnaa Chairman leh Khuallian tur te chu DC leh DUDO te ruat atan a dah a ni.

Office, School, Biakin te bakah Veng tin VC leh YMA te week hmang tura hriattir a, faina lam hawia hnatlang nei turin Committee chuan ngen nise a ti a. Veng fai, School leh Office fai inelna neih a rem tih bakah a endiktu turte a ruat fel nghal a ni. Extempore speech buatsaih a ni anga, a vawikhatna atan ‘slogan’ competition neih a ni bawk ang.