Vawiin (27.09.2016) chawhnu dar 1 khan Govt Lawngtlai College-a Public Administration Department leh World Vision (CADP) buatsaihin Govt Lawngtlai College Hall-ah Consumer Rights and Protection chungchang zir ho a ni.

He Awareness Campaign hi Asst Professor Dr David V.Khiangte, GLC chuan kaihruaiin, Khuallian Pu Laldinpuia Tlau, Chief Judicial Magistrate chuan thil lei leh hralh chungchanga mipuite chanvo sawiin, thil leitute leh hmangtute'n kan thil leite Maximum Retail Price (MRP) ang ngeia lei chu kan mawhphurhna a nih thu te, bukna dik lo hman leh hralh chungchangah dik lo taka thil titu sumdawngte chu dan ang taka hrem theih an nih thu te sawiin, hemi chungchangah hian Mizo mipuite kan harh chhuah a hun tawh hle a ni, a ti.

He hunah hian Lawngtlai District Court-a Advocate-te Pu C.Lalrinfela leh Pu ST. Ramhmachhuanmawia te'n Consumer Rights chungchang an zirtir a. World Vision India, Chhimtuipui ADP atangin Co-ordinator Pu HL. Rinawma pawhin kal khawmte fuihna thu a sawi bawk.

Govt Lawngtlai College-a he Awareness Campaign neihah hian zirlaite atangin an hriat chian duh zawhna leh chhanna hun hman a ni bawk a. Zirlai 260 vel an tel thei a ni.